ભારત અને સાઉથ આફ્રિકા વચ્ચે ટેસ્ટ અને વનડે સીરીઝ સમાપ્ત થયા બાદ T20 સીરીઝ શરૂ થવા જઈ રહી છે. બંને ટીમો વચ્ચે પ્રથમ T20 મેચ મંગળવારે ભુવનેશ્વરમાં રમાશે. પાંચ મેચની T20 શ્રેણી માટે બંને ટીમ રવિવારે ઓડિશાની રાજધાની ભુવનેશ્વર પહોંચી હતી. જ્યારે આફ્રિકાએ ટેસ્ટ શ્રેણીમાં પ્રભુત્વ જમાવ્યું હતું, ત્યારે ભારતે ODI શ્રેણીમાં જોરદાર પ્રદર્શન કર્યું હતું અને 2-1થી જીત મેળવી હતી. સૂર્યકુમાર યાદવની આગેવાની હેઠળની ટીમ પાસેથી પણ વધુ સારા પ્રદર્શનની અપેક્ષા રાખવામાં આવશે.
ઓડિશા ક્રિકેટ એસોસિએશનના પ્રમુખ પંકજ લોચન મોહંતીએ, પ્રથમ T20 પહેલા, બંને ટીમોની સુરક્ષા વ્યવસ્થા અને ભુવનેશ્વરમાં હોટેલ મેફેરમાં સારા સ્વાગત પર ભાર મૂક્યો હતો. તેણે જણાવ્યું કે સોમવારે બારાબતી સ્ટેડિયમમાં બંને ટીમોના પ્રેક્ટિસ સેશનનું આયોજન કરવામાં આવ્યું છે. પાંચ મેચોની આ શ્રેણીની પ્રથમ મેચ 9 ડિસેમ્બરે કટકના ઐતિહાસિક બારાબતી સ્ટેડિયમમાં રમાશે. ભુવનેશ્વરમાં બંને ટીમોના આગમનથી સ્થાનિક ક્રિકેટ પ્રેમીઓમાં ભારે ઉત્સાહ જોવા મળી રહ્યો છે.
બારાબતી સ્ટેડિયમમાં લગભગ 45 હજાર દર્શકોને બેસવાની વ્યવસ્થા કરવામાં આવી છે અને તમામ તૈયારીઓ લગભગ પૂર્ણ થઈ ગઈ છે. આ શ્રેણીમાં ભારતીય ટીમની કમાન અનુભવી સૂર્યકુમાર યાદવના હાથમાં છે, જ્યારે દક્ષિણ આફ્રિકાનું નેતૃત્વ એડન માર્કરામ કરશે.
ભારતીય ટીમે શનિવારે ત્રીજી અને નિર્ણાયક વનડેમાં 61 બોલ બાકી રહેતા દક્ષિણ આફ્રિકાને નવ વિકેટે હરાવીને શ્રેણી 2-1થી જીતી લીધી હતી. કુલદીપ (10 ઓવરમાં 41 રન) અને ક્રિષ્ના (9.5 ઓવરમાં 66 રન) એ ચાર-ચાર વિકેટ લીધી હતી જેના કારણે ક્વિન્ટન ડી કોક (106)ની સદી છતાં દક્ષિણ આફ્રિકા 47.5 ઓવરમાં 270 રનમાં ઓલઆઉટ થઈ ગયું હતું. ભારતે 39.5 ઓવરમાં એક વિકેટે લક્ષ્ય હાંસલ કરી લીધું હતું. આ રીતે તેણે ટેસ્ટ શ્રેણીમાં 0-2થી મળેલી હારની નિરાશાને અમુક અંશે ઓછી કરી. બંને ટીમો હવે 9 ડિસેમ્બરથી શરૂ થનારી પાંચ મેચની T20 આંતરરાષ્ટ્રીય શ્રેણીમાં સામસામે ટકરાશે.
