તેલંગાણાના મુખ્યમંત્રી રેવંત રેડ્ડીએ રવિવારે રામલીલા મેદાનમાં કોંગ્રેસની ‘વોટ ચોર, ગદ્દી છોડ’ રેલીમાં હાજરી આપી હતી. આ દરમિયાન તેમણે દાવો કર્યો હતો કે ભારતીય જનતા પાર્ટીને છેલ્લી લોકસભા ચૂંટણીમાં 400 બેઠકો મળી ન હતી, તેથી હવે SIRના નામ પર મતદાર યાદીમાંથી દલિત, આદિવાસીઓ, લઘુમતી અને ગરીબોના નામ હટાવવામાં આવી રહ્યા છે. તેમણે કહ્યું કે વોટ ચોરી સામેની આ લડાઈમાં કાર્યકરોએ રાહુલ ગાંધી સાથે ખભે ખભા મિલાવીને ઊભા રહેવું પડશે.
રેવન્ત રેડ્ડીએ કહ્યું, ‘જ્યારે તેમને (ભાજપ)ને 400 બેઠકો ન મળી, ત્યારે તેમણે SIRના નામે દલિતો, આદિવાસીઓ, અલ્પસંખ્યકો અને ગરીબોના મતોનો નાશ કરવાનું શરૂ કરી દીધું.’ તેમણે કહ્યું કે વોટ ચોરીની આ સમસ્યા કોંગ્રેસની નથી પરંતુ દેશની છે. આપણે રાહુલ ગાંધીજીની આ લડાઈને મજબૂત કરવી પડશે. નહીંતર આ લોકો ગરીબોના હક્કો છીનવી લેશે. રેડ્ડીએ કહ્યું, ‘આપણે રાહુલ ગાંધીના સૈનિક બનીને મોદી સામે લડવું પડશે.’
સીએમ સુખુએ ભાજપ પર નિશાન સાધ્યું
હિમાચલ પ્રદેશના મુખ્યમંત્રી સુખવિંદર સિંહ સુખુએ ભાજપ પર વોટ ચોરી દ્વારા સરકારો બનાવીને લોકશાહીને નુકસાન પહોંચાડવાનો અને લોકોના મતોની શક્તિને મંદ કરવાનો આરોપ લગાવ્યો. તેમણે લોકોને અપીલ કરી કે દેશમાં વોટ ચોરી ન થવા દે. સુખુએ કહ્યું કે કોંગ્રેસ રેલીમાં હાજર લોકોની તાકાતથી આવી ગરબડ અટકાવશે.
કોંગ્રેસની રેલીમાં રાહુલ ગાંધીએ શું કહ્યું?
કોંગ્રેસના પૂર્વ અધ્યક્ષ રાહુલ ગાંધીએ વોટ ચોરીને લઈને પીએમ મોદી, ભારતીય જનતા પાર્ટી અને ચૂંટણી પંચ પર આકરા પ્રહારો કર્યા હતા. તેમણે કહ્યું કે ચોરી ભાજપના ડીએનએમાં છે, પરંતુ તેમની પાર્ટી સત્ય સાથે ઉભી રહેશે અને દેશમાંથી આરએસએસ સરકારને હટાવી દેશે. રાહુલ ગાંધીએ કોંગ્રેસ અધ્યક્ષ મલ્લિકાર્જુન ખડગે અને મહાસચિવ પ્રિયંકા ગાંધી વાડ્રાની સાથે રામલીલા મેદાન ખાતે કોંગ્રેસની ‘વોટ ચોર, ગદ્દી છોડ’ રેલીમાં વડાપ્રધાન મોદી અને ગૃહમંત્રી અમિત શાહ પર નિશાન સાધ્યું હતું. તેમણે દાવો કર્યો કે પીએમ મોદીનો વિશ્વાસ ઉઠી ગયો છે કારણ કે તેમને ખબર પડી છે કે તેમની વોટ ચોરી પકડાઈ ગઈ છે.
