દિલ્હીના બગડતા વાતાવરણને લઈને રાજકીય ઘર્ષણ હવે નાટકીય સ્વરૂપ લેતું જોવા મળી રહ્યું છે. આમ આદમી પાર્ટી (AAP) એ ગુરુવારે અનોખી રીતે પ્રદૂષણ સામે વિરોધ નોંધાવ્યો. પાર્ટી દ્વારા જાહેર કરાયેલા એક વીડિયોમાં સાન્તાક્લોઝના પોશાક પહેરેલા બે લોકો રસ્તા પર બેહોશ થતા જોવા મળ્યા હતા, જેનું કારણ ગંભીર વાયુ પ્રદૂષણ હોવાનું કહેવાય છે.
AAPના વરિષ્ઠ નેતા અને દિલ્હીના પૂર્વ મંત્રી સૌરભ ભારદ્વાજે આ વીડિયો સોશિયલ મીડિયા પ્લેટફોર્મ ‘X’ પર શેર કર્યો છે. તે વીડિયોમાં લખે છે કે, “દિલ્હીના પ્રદૂષણને કારણે સાંતાક્લોઝ બેહોશ થઈ ગયો.” વીડિયોમાં સાન્તાક્લોઝના પોશાક પહેરેલા અને પ્રદૂષણ વિરોધી માસ્ક પહેરેલા બે લોકો કનોટ પ્લેસની શેરીઓમાં જોવા મળે છે, જેઓ અચાનક તૂટી પડે છે. આ પછી સૌરભ ભારદ્વાજ અને અન્ય નેતાઓ તેમને CPR આપતા જોવા મળે છે.
નોંધનીય છે કે આ અનોખું પ્રદર્શન એવા સમયે આવ્યું છે જ્યારે રાજધાનીની હવાની ગુણવત્તા અત્યંત નબળી શ્રેણીમાં છે. સેન્ટ્રલ પોલ્યુશન કંટ્રોલ બોર્ડના જણાવ્યા અનુસાર ગુરુવારે દિલ્હીનો એર ક્વોલિટી ઈન્ડેક્સ (AQI) 358 નોંધાયો હતો.
પ્રદૂષણને લઈને ભાજપ અને AAP વચ્ચે આરોપ-પ્રત્યારોપ
પ્રદૂષણને લઈને આ વીડિયો એવા સમયે સામે આવ્યો છે જ્યારે દિલ્હીમાં સત્તાધારી ભાજપ અને વિપક્ષ આમ આદમી પાર્ટી વચ્ચે આરોપ-પ્રત્યારોપનો દોર વધી રહ્યો છે. દિલ્હીના પર્યાવરણ મંત્રી મનજિન્દર સિંહ સિરસાએ તાજેતરમાં AAP પર એક દાયકાથી વધુ સમય સુધી શાસન કરવા છતાં રાજધાનીને પ્રદૂષિત સ્થિતિમાં છોડવાનો આરોપ લગાવ્યો હતો. જો કે, AAPએ આ આરોપોને નકારી કાઢ્યા છે.
