તારિક રહેમાને બાંગ્લાદેશના વડાપ્રધાન તરીકે શપથ લીધા છે. રાષ્ટ્રપતિ મોહમ્મદ શહાબુદ્દીને સંસદ ભવનમાં એક સમારોહમાં તેમને વડાપ્રધાન પદના શપથ લેવડાવ્યા હતા. તેમની સાથે અન્ય 13 કેબિનેટ મંત્રીઓએ પણ શપથ લીધા છે. બીજી તરફ વિપક્ષ જમાત-એ-ઈસ્લામી અને નેશનલ સિટિઝન્સ પાર્ટી (NCP)એ રહેમાન વિરુદ્ધ મોરચો ખોલ્યો છે. આ બંને પક્ષોએ ચેતવણી આપી છે કે જો BNP સરકાર જુલાઈ ચાર્ટર નહીં અપનાવે તો દેશભરમાં વિરોધ પ્રદર્શન કરવામાં આવશે. જો કે, પ્રારંભિક મતભેદ અને બહિષ્કારની ચેતવણી પછી, બંને પક્ષોના સાંસદોએ શપથ લીધા.
તમને જણાવી દઈએ કે તારિક રહેમાનની પાર્ટી BNPએ પોતાના સાંસદોને બંધારણ સુધારણા પરિષદના ફોર્મ પર હસ્તાક્ષર કરવાનો ઇનકાર કર્યો હતો અને તારિક રહેમાન સહિત BNPના તમામ સાંસદોએ માત્ર બાંગ્લાદેશી સંસદના સભ્ય તરીકે શપથ લીધા છે. BNPનું કહેવું છે કે બંધારણીય સુધારણા પરિષદના નિયમો હજુ વર્તમાન બંધારણનો ભાગ નથી અને તેના પર સંસદમાં ચર્ચા થવાની જરૂર છે. BNP એ મંગળવારે જાહેરાત કરી હતી કે તેના સાંસદો બંધારણીય સુધારણા પરિષદના સભ્યો તરીકે શપથ લેશે નહીં, જેનો ઉદ્દેશ્ય જુલાઈ ચાર્ટર લોકમતમાં કરાયેલા ફેરફારોને સામેલ કરવા બાંગ્લાદેશના બંધારણમાં ફેરફાર કરવાનો છે. બીએનપીના વરિષ્ઠ નેતા સલાઉદ્દીન અહેમદે તારિક રહેમાનની હાજરીમાં પાર્ટીના નિર્ણયની જાહેરાત કરી હતી.
બે શપથ વિધિથી વિવાદ શરૂ થયો
વાસ્તવમાં, આ વિવાદ બે અલગ-અલગ શપથ ગ્રહણ પ્રક્રિયાઓથી સંબંધિત છે જે તમામ ચૂંટાયેલા સાંસદોએ લેવાની હતી. તાજેતરની ચૂંટણીઓમાં, મતદારોએ માત્ર સાંસદોને જ ચૂંટ્યા ન હતા પરંતુ જુલાઈ ચાર્ટર પર જનમતમાં પણ ભાગ લીધો હતો. BNPએ ચૂંટણીમાં બે તૃતીયાંશ બહુમતી મેળવી હતી, જોકે વિપક્ષોએ ધાંધલધમાલનો આક્ષેપ કર્યો હતો. બીજી તરફ, જુલાઈ ચાર્ટરને લગભગ 62 ટકા સમર્થન મળ્યું છે, જેનો હેતુ સંસદને મર્યાદિત સમયગાળા માટે બંધારણમાં સુધારો કરવાની વિશેષ સત્તા આપવાનો છે.
BNP, જેણે જુલાઈ ચાર્ટર પર હસ્તાક્ષર કર્યા હતા, તેણે પલટવાર કર્યો
બીએનપીએ આ ચાર્ટર પર હસ્તાક્ષર કર્યા હતા, પરંતુ પાર્ટી નેતૃત્વ ઘણી જોગવાઈઓ સાથે અસંમતિ વ્યક્ત કરી રહ્યું છે. પાર્ટીના નેતાઓનું કહેવું છે કે ચાર્ટર તૈયાર કરતી વખતે તેમની સલાહ લેવામાં આવી ન હતી. એક જ દિવસે ચૂંટણી અને લોકમત યોજવાનો નિર્ણય વચગાળાના નેતૃત્વ દ્વારા લેવામાં આવ્યો હતો, જેમાં અર્થશાસ્ત્રી અને નોબેલ પુરસ્કાર વિજેતા મોહમ્મદ યુનુસે મુખ્ય ભૂમિકા ભજવી હતી. સાંસદો અને સરકારના શપથ ગ્રહણ સમારોહ પહેલા, BNPના વરિષ્ઠ નેતા સલાહુદ્દીન અહેમદે મંગળવારે પાર્ટી વતી જાહેરાત કરી હતી કે BNP સાંસદો બંધારણીય સુધારણા પરિષદના સભ્યો તરીકે શપથ લેશે નહીં. તારિક રહેમાનની હાજરીમાં આ જાહેરાત કરવામાં આવી હતી.
