બન્નુ બ્લાસ્ટના સમાચાર: પાકિસ્તાનના ઉત્તર-પશ્ચિમ ક્ષેત્રના બન્નુ જિલ્લામાં શનિવારે બે રોડસાઇડ બોમ્બ વિસ્ફોટોમાં સાત લોકો માર્યા ગયા અને ઘણા ઘાયલ થયા. આ વિસ્તાર અફઘાનિસ્તાન બોર્ડર પાસે આવેલો છે અને છેલ્લા કેટલાક સમયથી અહીં હિંસક ઘટનાઓ સતત બની રહી છે.
પોલીસના જણાવ્યા અનુસાર, પહેલો બ્લાસ્ટ ત્યારે થયો જ્યારે મુસાફરોથી ભરેલી વાન રસ્તા પરથી પસાર થઈ રહી હતી. વિસ્ફોટ એટલો જોરદાર હતો કે 5 લોકોના ઘટનાસ્થળે જ મોત થયા હતા, જ્યારે ઘણા લોકો ઘાયલ થયા હતા. ઘાયલોમાં કેટલાકની હાલત ગંભીર હોવાનું કહેવાય છે.
ઘાયલોને મદદ કરી રહેલા લોકો પર બીજો હુમલો
પહેલા બ્લાસ્ટ બાદ સ્થાનિક લોકોએ ઘાયલોને બચાવવા અને એમ્બ્યુલન્સમાં લઈ જવા લાગ્યા. દરમિયાન, હુમલાખોરોએ રિમોટ કંટ્રોલનો ઉપયોગ કરીને બીજો બોમ્બ વિસ્ફોટ કર્યો હતો. આ હુમલામાં રાહત કાર્યમાં લાગેલા બે લોકોના મોત થયા હતા.
રાષ્ટ્રપતિ ઝરદારીએ દુઃખ વ્યક્ત કર્યું
પાકિસ્તાનના રાષ્ટ્રપતિ આસિફ અલી ઝરદારીએ હુમલાની નિંદા કરી છે અને નિર્દોષ લોકોના મોત પર શોક વ્યક્ત કર્યો છે. તેમણે પીડિતોના પરિવારો પ્રત્યે સંવેદના વ્યક્ત કરી અને ઘાયલોની ઝડપથી સ્વસ્થ થવાની કામના કરી.
વિસ્તારમાં સુરક્ષા વધારી દેવામાં આવી છે
ઘટના બાદ પોલીસ અને સેનાએ સમગ્ર વિસ્તારને ઘેરી લીધો છે. સુરક્ષા એજન્સીઓને આશંકા છે કે આ વિસ્તારમાં વધુ વિસ્ફોટક છુપાયેલા હોઈ શકે છે, તેથી મોટાપાયે સર્ચ ઓપરેશન હાથ ધરવામાં આવી રહ્યું છે. તમામ ઘાયલોને નજીકની હોસ્પિટલમાં દાખલ કરવામાં આવ્યા છે. હાલમાં કોઈ સંગઠને આ હુમલાની જવાબદારી લીધી નથી.
આતંકવાદી ઘટનાઓ સતત વધી રહી છે
બન્નુ જિલ્લામાં તાજેતરના સમયમાં હિંસાની ઘટનાઓ ઝડપથી વધી છે. એક અઠવાડિયા પહેલા આતંકવાદીઓએ પુલને નુકસાન પહોંચાડવાનો પ્રયાસ કર્યો હતો. 12 જૂને થયેલા હુમલામાં બે પોલીસકર્મીઓના પણ મોત થયા હતા.
સતત હુમલાઓથી નારાજ સ્થાનિક લોકો સરકાર પાસે સુરક્ષા વ્યવસ્થા મજબૂત કરવા અને આતંકવાદ વિરુદ્ધ કડક કાર્યવાહી કરવાની માંગ કરી રહ્યા છે. તાજેતરમાં યોજાયેલી આદિવાસી બેઠકમાં આ વિસ્તારમાંથી ઉગ્રવાદને સંપૂર્ણપણે નાબૂદ કરવાની માગણી કરવામાં આવી હતી.
આ પણ વાંચો-ઈરાન યુદ્ધનો અંત, હવે એશિયામાં નવું તોફાન! ચીને તાઈવાનને ચારેય બાજુથી ઘેરી લીધું, ડ્રેગન વધ્યો તણાવ
