મુંબઈઃ T20 વર્લ્ડ કપ 2026માં સોમવારે વાનખેડે મેદાન પર રમાયેલી મેચમાં વેસ્ટ ઈન્ડિઝ ઝિમ્બાબ્વેને 107 રનથી કચડી નાખ્યું. ટી-20 વર્લ્ડ કપમાં રનના મામલે વેસ્ટ ઈન્ડિઝની આ બીજી સૌથી મોટી જીત છે.
વેસ્ટ ઈન્ડિઝ દ્વારા આપવામાં આવેલા 255 રનના વિશાળ લક્ષ્યાંકનો પીછો કરવા ઉતરેલી ઝિમ્બાબ્વે ટીમનો બેટિંગ ઓર્ડર પત્તાના ઘરની જેમ પડી ગયો હતો. ગ્રુપ સ્ટેજમાં શાનદાર ફોર્મમાં રહેલો બ્રાયન બેનેટ માત્ર 5 રન બનાવીને આઉટ થયો હતો. વિકેટકીપર-બેટ્સમેન મારુમણી પણ બેટથી કંઈ ખાસ બતાવી શક્યો નહોતો અને માત્ર 14 રન બનાવીને પેવેલિયન પરત ફર્યો હતો.
ડીયોન માયર્સે 15 બોલમાં 3 ચોગ્ગા અને બે છગ્ગા સાથે 28 રન બનાવ્યા હતા. જોકે, રેયાન બર્લ ખાતું ખોલાવ્યા વગર જ પેવેલિયન પરત ફર્યો હતો. કેપ્ટન સિકંદર રઝાએ 20 બોલમાં 27 રન જ્યારે બ્રાયન ઈવાન્સે 21 બોલમાં 43 રન બનાવ્યા હતા. ઇવાન્સે પોતાની ઇનિંગમાં 2 ચોગ્ગા અને 5 છગ્ગા ફટકાર્યા હતા. જોકે, તે બીજા છેડેથી બાકીના બેટ્સમેનોનો સાથ મેળવી શક્યો ન હતો અને 147 રન બનાવીને આખી ટીમ પડી ભાંગી હતી.
બોલિંગમાં કેરેબિયન ટીમના સ્પિન બોલર ગુડાકેશ મોતી અને અકીલ હુસૈન ઝિમ્બાબ્વેના બેટ્સમેનો માટે અગમ્ય કોયડો સાબિત થયા હતા. ગુડાકેશે 4 ઓવરમાં માત્ર 28 રન આપીને 4 વિકેટ લીધી હતી. આ સાથે જ અકિલે 28 રનમાં 3 મોટી વિકેટ ઝડપી હતી.
આ પહેલા વેસ્ટ ઈન્ડિઝે 20 ઓવરમાં 6 વિકેટ ગુમાવીને 254 રન બનાવ્યા હતા. ટીમ વતી શિમરોન હેટમાયરે 34 બોલમાં સૌથી વધુ 85 રન બનાવ્યા હતા. આ ઇનિંગમાં હેટમાયરે 7 ફોર અને 7 સિક્સર ફટકારી હતી. જ્યારે રોવમેન પોવેલે 35 બોલમાં 59 રનનું યોગદાન આપ્યું હતું. શેરફેન રધરફોર્ડે માત્ર 13 બોલમાં 31 રન બનાવ્યા અને અણનમ રહ્યો. આ જીત સાથે વેસ્ટ ઈન્ડિઝ સુપર-8ના ગ્રુપ 1માં પ્રથમ સ્થાને પહોંચી ગયું છે. ટીમ આગામી મેચમાં 26 ફેબ્રુઆરીએ દક્ષિણ આફ્રિકા સામે ટકરાશે.
