અત્યંત જોખમી અને ઝેરી કેમિકલ વેસ્ટનો ગેરકાયદેસર નિકાલ કર્યો હોવાનો પર્દાફાશ
ડ્રાઈવરે પોલીસ સમક્ષ ‘કાઈઝન ફાર્મા’ કંપનીના બીલ અને ઈવે બિલ રજૂ કર્યા
(પ્રતિનિધિ)ભરૂચ, દહેજમાં પર્યાવરણ અને લોકોના સ્વાસ્થ્ય સાથે ચેડાં કરતું એક મોટું કૌભાંડ એલ.સી.બી ભરૂચે ઝડપી પાડ્યું છે.સાયખા જીઆઈડીસીમાં આવેલી માલ્વીસ ઈન્ડસ્ટ્રીઝ દ્વારા અત્યંત જોખમી અને ઝેરી કેમિકલ વેસ્ટનો ગેરકાયદેસર નિકાલ કરવામાં આવતો હોવાનો ખુલાસો થયો છે.
મળતી માહિતી મુજબ ૧૧ એપ્રિલ ૨૦૨૬ના રોજ એલ.સી.બી ભરૂચની ટીમ દહેજ વિસ્તારમાં પેટ્રોલિંગમાં હતી ત્યારે બાતમી મળી હતી કે જોલવા ગામ નજીક ખાડીમાં એક ટેન્કર મારફતે જોખમી કેમિકલ વેસ્ટ ખાલી કરવામાંની પેરવીમાં છે. બાતમીના આધારે પોલીસ તાત્કાલિક સ્થળ પર પહોંચી હતી અને આર.જે.૦૯-જીસી૭૮૩૨ નંબરનું ટેન્કર ઝડપી પાડ્યું હતું.
પોલીસે ટેન્કર ચાલક સંદીપસિંહ ઉર્ફે શેરૂની અટકાયત કરી પૂછપરછ હાથધરી હતી. શરૂઆતમાં ડ્રાઈવરે પોલીસ સમક્ષ ‘કાઈઝન ફાર્મા’ કંપનીના બીલ અને ઈવે બિલ રજૂ કર્યા હતા. પરંતુ દસ્તાવેજોની તપાસ કરતા સમગ્ર મામલો શંકાસ્પદ લાગ્યો હતો.
ઊંડાણપૂર્વકની તપાસમાં સામે આવ્યું કે રજૂ કરાયેલા તમામ બિલો અને દસ્તાવેજો બોગસ હતા.આરોપીઓએ જીએસટી નંબર અને જાણીતી કંપનીઓના નામનો દુરુપયોગ કરીને કાયદેસર રીતે કેમિકલ ટ્રાન્સપોર્ટ થતું હોય તેવો દેખાવ ઊભો કર્યો હતો જેથી કોઈને શંકા ન જાય.જોકે પોલીસે સમગ્ર નેટવર્કનો ભાંડો ફોડી નાખ્યો હતો.
સૌથી ચોંકાવનારી બાબત એ રહી કે એફએસએલ અને જીપીસીબીના રિપોર્ટ મુજબ ઝડપાયેલું કેમિકલ અત્યંત જોખમી અને એસિડિક હોવાનું સામે આવ્યું છે.કેમિકલની પીએચ વેલ્યુ ૨થી પણ ઓછી નોંધાઈ હતી.જે પર્યાવરણ, પાણીના સ્ત્રોતો, જળચર પ્રાણીઓ અને માનવ આરોગ્ય માટે ગંભીર ખતરો માનવામાં આવે છે.નિષ્ણાતોના મતે આવું કેમિકલ જો ખુલ્લી ખાડી કે જમીનમાં ઠાલવવામાં આવે તો લાંબા ગાળે પાણી અને જમીન બંને પ્રદૂષિત થઈ શકે છે.
તપાસ દરમ્યાન કંપનીના માલિક અંબરીસ ગીરીશભાઈ માલવી, રાજકોટના હરીકૃષ્ણ શ્યામજીભાઈ ચૌહાણ સહિત યોગેન્દ્રસિંહ અને રાહુલ નામના શખ્સોની સંડોવણી સામે આવી છે.તમામ આરોપીઓ સામે દહેજ પોલીસે ભારતીય ન્યાય સંહિતા એટલે કે બીએનએસની કલમ ૨૮૬, ૨૮૭, ૩૩૬, ૩૩૮ અને ૬૧(૨) હેઠળ ગુનો નોંધી આગળની કાર્યવાહી શરૂ કરી છે.
પોલીસે ઘટના સ્થળેથી અંદાજે ૧૦ લાખનું ટેન્કર, ઝેરી કેમિકલ તેમજ મોબાઈલ ફોન સહિત કુલ ૧૦,૪૫,૫૩૩નો મુદ્દામાલ જપ્ત કર્યો છે.
સવાલ એ ઉભો થયો છે કે આ ગેરકાયદેસર કેમિકલ નિકાલનો વેપલો કેટલા સમયથી ચાલી રહ્યો હતો? શું માત્ર એક જ કંપની સંડોવાયેલી છે કે પાછળ વધુ મોટું નેટવર્ક કામ કરી રહ્યું છે? એલ.સી.બી અને દહેજ પોલીસ હવે સમગ્ર મામલાની ઊંડાણપૂર્વક તપાસ કરી રહી છે.
સવાલ એ ઉભો થયો છે કે આ ગેરકાયદેસર કેમિકલ નિકાલનો વેપલો કેટલા સમયથી ચાલી રહ્યો હતો? શું માત્ર એક જ કંપની સંડોવાયેલી છે કે પાછળ વધુ મોટું નેટવર્ક કામ કરી રહ્યું છે? એલ.સી.બી અને દહેજ પોલીસ હવે સમગ્ર મામલાની ઊંડાણપૂર્વક તપાસ કરી રહી છે.
