ઈંગ્લેન્ડના વેસ્ટ મિડલેન્ડ્સમાં એક શીખ મહિલા પર બળાત્કાર કરવાના આરોપમાં એક પુરુષ અને એક મહિલાની ધરપકડ કરવામાં આવી છે. ગયા મહિને ઓલ્ડબરી વિસ્તારમાં આ ગુનો આચરવામાં આવ્યો હતો. વંશીય ભેદભાવના કારણે આ ઘટનાને અંજામ આપવામાં આવ્યો હોવાનું માનવામાં આવે છે. વેસ્ટ મિડલેન્ડ પોલીસે જણાવ્યું હતું કે આ જ કાઉન્ટીના હેલેસોવનમાં એક મહિલા પર બળાત્કારના સંદર્ભમાં ધરપકડ કરવામાં આવી હતી. બાદમાં 20 વર્ષીય બ્રિટિશ શીખ મહિલાની ઉત્પીડનના કેસમાં બંને આરોપીઓની પણ ધરપકડ કરવામાં આવી હતી.
ગયા મહિને થયેલા યૌન શોષણની ઘટનામાં, બે ગોરા પુરુષ હુમલાખોરોએ પીડિતાને કહ્યું, ‘તમે આ દેશના નથી, અહીંથી ચાલ્યા જાઓ.’ આ ઘટનાથી શીખ સમુદાયમાં ખળભળાટ મચી ગયો હતો. યુકેના ગુના સામે લડતી સંસ્થા ક્રાઈમસ્ટોપર્સે આ વંશીય પ્રેરિત બળાત્કારના ગુનેગારોની ધરપકડ અને દોષિત ઠરાવે તેવી માહિતી માટે 20 હજાર પાઉન્ડના ઈનામની જાહેરાત કરી હતી. બ્રિટિશ શીખ સંગઠનોએ પણ સોશિયલ મીડિયા પર એકજૂથ થઈને આ હુમલાના ગુનેગારોને દોષિત ઠેરવતા કોઈપણ ફૂટેજ પ્રદાન કરવા બદલ 10 હજાર પાઉન્ડનું આર્થિક ઈનામ આપ્યું હતું.
બ્રિટિશ સંસદમાં પણ આ મુદ્દો ઉઠાવવામાં આવ્યો હતો
બળાત્કાર અને હુમલાની આ ઘટના યુકેની સંસદમાં પણ ઉઠી હતી, જ્યાં ગૃહ સચિવ શબાના મહમૂદે હુમલાની નિંદા કરી હતી. તેમણે કહ્યું હતું કે, ‘જાતિ અથવા વંશીયતા દ્વારા પ્રેરિત જાતીય હુમલાની ભયાનકતા સંપૂર્ણપણે નિંદનીય છે. મને ખાતરી છે કે આખું ગૃહ આવા અપરાધોને સખત શબ્દોમાં વખોડવામાં મારી સાથે જોડાશે. આ સરકાર વંશીય તિરસ્કાર અથવા હિંસા ઉશ્કેરવા માટે શૂન્ય સહનશીલતા ધરાવશે.
