બેફામ દોડતી કાર રસના કોલાને અથડાતાં બેનાં મોત, ત્રણ ઘાયલ-શેરડીનો રસ પીવા ઉભા હતા ત્યારે બેફામ ઝડપે આવતી કારના ચાલકે સર્જેલો અકસ્માત
આણંદ, આણંદ નજીકથી પસાર થતા નેશનલ હાઇવે ઉપર અડાસ ગામના બ્રિજ નજીક વડોદરાથી અમદાવાદ તરફ જતાં રાજવી હોટલ નજીક આજે ઢળતી સાંજે પૂરઝડપે દોડતી કારનાં ડ્રાઇવરનો સ્ટેરીંગ પરનો કાબુ ચાલ્યો જતા આ કાર રોડ સાઈડના રસના કોલાને ધડાકાભેર ટકરાઈ હતીઅને હોટલ સામે જઈ ઉભી રહી હતી. અકસ્માતને કારણે ત્યાં ઉભા રહેલા બે વ્યક્તિઓનાં મોત થયા છે જ્યારે ત્રણ વ્યક્તિઓ ઘાયલ થઈ છે.
જે ખંભોળજના હોવાનું બહાર આવ્યું છે. આ અંગે પોલીસે ફરિયાદ દાખલ કરી કાર્યવાહી હાથ ધરી છે. અમદાવાદ શહેરના મણીનગર વિસ્તારમાં તક્ષશિલા મંદિર પાસે ચેતનાબેન સંજયભાઈ ડોડીયા નામની મહિલા પોતાના પતિ અને પરિવાર સાથે રહે છે. તેમના પતિ સંજયભાઈ મણીલાલ ડોડીયા કડિયા કામની મજૂરી કરતા હતા.
શુક્રવારે સવારે ૯ઃ૦૦ વાગે તેઓ અમદાવાદથી બે અરટિગા ગાડીઓ કરી પતિ તથા રાજેશભાઈ ગુંદા, રાધાબેન ગુંદા, પીમુંબેન નીનામા, મનોજભાઈ કટારા, કચરાભાઈ બારીયા તથા નાના બાળકો સહિત વડોદરા નજીક આવેલા અનગઢ ગામે મહોણી માતાએ દર્શન કરી દોઢ વાગ્યાની આસપાસ અનગઢથી પરત અમદાવાદ જવા નીકળ્યા હતા.
વાસદ ટોલનાકું પસાર કરી રાજવી કાઠીયાવાડી હોટલ ઉપર જમવા માટે ઉભા રહ્યા હતા. ચેતનાબેન તથા અન્ય પાણીની બોટલ લઈને ઊભા હતા. તે વખતે તેમના પતિ સંજયભાઈ ડોડીયા તથા મનોજભાઈ કટારા અને કચરાભાઈ બારીયા હોટલની બહાર શેરડી રસના કોલા ઉપર રસ પીવા માટે ગયા હતા.
તે વખતે આશરે સાડા ત્રણ વાગે અચાનક લાલ રંગની એક કાર પુરઝડપે આવી ધડાકાભેર રસના કોલાને અથડાઈ હતી અને હોટલની સામે આવી અચાનક ઊભી રહી હતી. જેથી ચેતનાબેન તથા અન્ય લોકો દોડીને રોડ પર ગયા. તેમણે જોયું તો તેમના પતિ સંજયભાઈ રોડની સાઈડમાં જમીન ઉપર પડેલા હતા તથા તેમની નજીક એક બહેન પડેલા હતા તથા તે બહેનને શરીરે ગંભીર ઈજાઓ થઈ હતી અને લોહી નીકળતું હતું.
તેમજ તેમની સાથે આવેલા મનોજભાઈ કટારા તથા કચરાભાઈ બારીયા અને એક નાની છોકરી માહિબેન તળપદા પણ રોડની બાજુમાં પડી હતી અને તેઓને હાથે પગે ઇજાઓ થઈ હતી. ત્યારબાદ ગાડીના ચાલકે તરત જ પોલીસ અને ૧૦૮ ને જાણ કરતાં મોબાઈલ આવી ગઈ હતી.
જેના તબીબે તપાસીને સંજયભાઈ ડોડીયાને તથા ઇજા પામનાર મહિલા શીતલબેન તળપદા રહે. ખંભોળજ ને મરણ પામેલા જાહેર કર્યા હતાં. જ્યારે અન્યને તાત્કાલિક હોસ્પિટલમાં લઈ જવામાં આવ્યા હતા.આ અંગે પોલીસે ફરિયાદ દાખલ કરી કાર્યવાહી હાથ ધરી છે.
