(પ્રતિનિધિ) અમદાવાદ, અમદાવાદ મ્યુનિસિપલ કોર્પોરેશનના ઇજનેર વિભાગ દ્વારા હાથ ધરવામાં આવતા વિવિધ પ્રોજેક્ટ્સ અને મરામતના કામોની ગુણવત્તા, પારદર્શિતા અને વહીવટી પ્રક્રિયાને વધુ વેગવંતી બનાવવા માટે મ્યુનિસિપલ કમિશનર દ્વારા એક નવો પરિપત્ર જાહેર કરવામાં આવ્યો છે.
આ નવા સરક્યુલર મુજબ હવેથી ઇજનેર, વહીવટ અને પ્રિ-ઓડિટ વિભાગે બિલિંગ અને મેઝરમેન્ટ બુક રેકોર્ડ કરવા માટે એક ચોક્કસ અને ચુસ્ત કાર્યપદ્ધતિનું પાલન કરવાનું રહેશે.
આ હેઠળ પ્રોજેક્ટની અંદર કેટલી કામગીરી થઈ છે અને મટિરિયલનો ઉપયોગ કરવામાં આવ્યો છે તેની વિગતો આપવાની રહેશે. આ સાથે જ સંપૂર્ણ પ્રોજેક્ટમાં કેટલાં જથ્થાને નક્કી કરવામાં આવ્યો છે તેમાંથી કેટલો ઉપયોગ કરવામાં આવ્યો છે તેની પણ વિગતો વેરિફિકેશન કરીને આપવાની રહેશે.
આ અંગેની નવી માર્ગદર્શિકા અનુસાર, સંબંધિત કામના અમલીકરણ અધિકારી અને પ્રોજેક્ટ મેનેજમેન્ટ કન્સલ્ટન્સી ના પ્રતિનિધિએ સરકારી, એન.એ.બી.એલ. અથવા સાઇટ લેબોરેટરીમાં ટેસ્ટિંગ દરમિયાનના જરૂરી ફોટોગ્રાફ્સ સ્માર્ટ સીટી ૩૧૧’ એપ્લિકેશન પર અપલોડ કરવાના રહેશે.
આ ફોટોગ્રાફ્સને માસિક પ્રગતિ અહેવાલમાં પણ સામેલ કરવા પડશે. આ ઉપરાંત, સાઇટ પર કામગીરી દરમિયાન કામની વિગત, કોન્ટ્રાક્ટરનું નામ અને સ્થળની વિગતો સાથેનો અહેવાલ પણ એપ પર મૂકવો ફરજિયાત બનશે.
તેમજ કોઈપણ પ્રોજેક્ટના મેઝરમેન્ટ (માપો) હવેથી અમલીકરણ અધિકારી, કોન્ટ્રાક્ટર અને પીએમસીના પ્રતિનિધિ દ્વારા સંયુક્ત રીતે સ્થળ પર લેવાના રહેશે. આ માપણી બાદ, કોન્ટ્રાક્ટરે તમામ જરૂરી દસ્તાવેજો અને મેઝરમેન્ટની સોફ્ટ કોપી ટેન્ડરમાં દર્શાવેલા અધિકૃત ઇ-મેઇલ દ્વારા ઝોનના ડેપ્યુટી સિટી ઇજનેર અને પી.એમ.સી. ઓફિસને મોકલવાની રહેશે. હસ્તાક્ષર અને સિક્કાવાળી નકલ એડિશનલ સિટી ઇજનેરની ઓફિસમાં ઇનવર્ડ કરાવવાની રહેશે.
ઇજનેર વિભાગના આસિસ્ટન્ટ ઇજનેર દ્વારા મેઝરમેન્ટ બુકમાં દરેક આઇટમના જથ્થાની વિગતો પોતાની સહીથી ‘સ્વહસ્તક’ લખવાની રહેશે, તેમાં આજ દિન સુધી થયેલ કુલ કામગીરીનો જથ્થો અને અગાઉના બિલમાં મંજૂર કરેલ જથ્થો તેમજ ચાલુ બિલમાં મંજૂર કરવા પાત્ર જથ્થો અને આ બિલ સુધી મંજૂર થયેલ કુલ જથ્થાની વિગતો આસિસ્ટન્ટ સિટી ઇજનેર અને ડેપ્યુટી સિટી ઇજનેરે તેની ચકાસણી કરીને મેઝરમેન્ટ બુક પ્રમાણિત કરવાની રહેશે. આ નોંધણી દરમિયાન કોઈ પણ પ્રકારની ચેકચાક ન થાય તેની ખાસ તકેદારી રાખવાની રહેશે.
આ સાથે જ મેઝરમેન્ટ બુક રેકોર્ડ થયા બાદ તેની સોફ્ટ કોપી ઇ-મેઇલ મારફતે પ્રિ-ઓડિટ વિભાગને મોકલવાની રહેશે. બિલિંગ કલાર્કે આ સરક્યુલર મુજબની તમામ વિગતો ચકાસ્યા બાદ જ એફએએસ બિલ બનાવવાની પ્રક્રિયા કરવાની રહેશે અને પ્રિ-ઓડિટર દ્વારા પણ તેની ચકાસણી કરવામાં આવશે. ઓડિટ દરમિયાન જો કોઈ વાંધા સામે આવે, તો તેનો પ્રત્યુત્તર આસિસ્ટન્ટ ઇજનેર, આસિસ્ટન્ટ સિટી ઇજનેર અને ડેપ્યુટી સિટી ઇજનેર મારફતે આપવાનો રહેશે.
જ્યારે કોર્પોરેશનના કામોમાં વપરાતી મુખ્ય સામગ્રીઓ જેવી કે સિમેન્ટ, સ્ટીલ, પાઇપો, સ્ટ્રકચરલ સ્ટીલ અને બ્રિજ માટેના સ્ટ્રેન્ડ વાયરના ડિલિવરી ચલણ, તેની આવક, વપરાશ અને બાકી રહેલા જથ્થાની વિગતોની ઓરિજિનલ ઇન્વોઇસ સાથે અમલીકરણ અધિકારી, ઁસ્ઝ્ર એજન્સી અને પ્રિ-ઓડિટર દ્વારા ઝીણવટભરી ચકાસણી કરવાની રહેશે.
