અમદાવાદ: શહેરમાં કન્સ્ટ્રક્શન સાઇટના કારણે જાહેર માર્ગો પર ગંદકી અને કાદવ ફેલાવતા તત્વો સામે અમદાવાદ મ્યુનિસિપલ કોર્પોરેશન (AMC) એ લાલ આંખ કરી છે. શહેરના પોશ ગણાતા બોડકદેવ વિસ્તારમાં રોડ ખરાબ કરવા બદલ એક જાણીતા બિલ્ડર ગ્રૂપ સામે મોટી દંડાત્મક કાર્યવાહી કરવામાં આવી છે.
બોડકદેવ વોર્ડમાં આવેલા જાણીતા સિંધુભવન રોડ (Sindhubhavan Road) પર ‘ઝેડ ગ્રૂપ’ ના નવા બની રહેલા પ્રોજેક્ટની સાઇટ આવેલી છે. આ સાઇટ પરથી માટી ભરીને બહાર નીકળતા વાહનોના કારણે જાહેર માર્ગ પર મોટા પ્રમાણમાં કાદવ-કીચડ ફેલાયો હતો. આ ગંદકીના કારણે વાહનચાલકોને ભારે અડચણ ઉભી થઈ હતી અને અકસ્માતનો ભય પણ વધી ગયો હતો.
આ બાબત ધ્યાને આવતા જ, પશ્ચિમ ઝોનના સોલિડ વેસ્ટ મેનેજમેન્ટ (SWM) વિભાગે ત્વરિત પગલાં ભરીને ઝેડ ગ્રૂપના બિલ્ડરને રૂપિયા ૫ લાખનો વહીવટી દંડ ફટકાર્યો છે.
તંત્રના જણાવ્યા અનુસાર, વરસાદ કે પાણીના કારણે રસ્તા પર પડેલો કાદવ સુકાઈ ગયા પછી રોડ એકદમ ઉબડખાબડ બની જાય છે.
બિલ્ડરોની આ બેદરકારી માત્ર રસ્તા પૂરતી સીમિત નથી રહેતી. રોડ પર પથરાયેલી આ માટી જ્યારે વરસાદી પાણી સાથે વહીને ગટર અથવા સ્ટોર્મ વોટર લાઈન (Storm Water Line) માં જાય છે, ત્યારે આખી ડ્રેનેજ સિસ્ટમ ચોકઅપ (જામ) થઈ જાય છે. પરિણામે ચોમાસા દરમિયાન શહેરમાં પાણી ભરાવવાની ગંભીર સમસ્યા સર્જાય છે.
