અમદાવાદ (પ્રતિનિધિ) અમદાવાદ મ્યુનિસિપલ કોર્પોરેશનની ચૂંટણીના પરિણામો જાહેર થયા બાદ વિજેતા ઉમેદવારોના ખોટા પુરાવાને લઇને વિવાદો સર્જાયા છે. તાજેતરમાં કુબેરનગરના કોંગ્રેસ પક્ષમાંથી જીતેલા મહિલા ઉમેદવાર નું સ્કૂલ સર્ટિફિકેટ ખોટું હોવાનું બહાર આવતાં પોલીસ ફરિયાદ નોંધાઇ છે.
હવે નરોડા વોર્ડના ભાજપ પક્ષમાંથી વિજેતા ઉમેદવાર ડો. ચંદાબેન વિઠ્ઠલભાઈ પટેલ વિરુદ્ધ ગંભીર કાયદાકીય આક્ષેપો સાથે પોલીસ ફરિયાદ દાખલ કરવા પુરાવા સાથે પોલીસ કમિશનર અને સ્થાનિક પોલીસ સ્ટેશનમાં અરજદારે રજૂઆત કરી છે. અરજદારની લેખિત ફરિયાદ મુજબ, મહિલા કોર્પોરેટરે પોતાની ડોક્ટરની ડિગ્રી સાથે રજૂ કરેલી શૈક્ષણિક લાયકાત અંગે ખોટી માહિતી આપીને મતદારો અને વહીવટી તંત્ર સાથે છેતરપિંડી કરી છે.
નરોડા પોલીસે અરજી લઇ વધુ તપાસ હાથધરી છે. અરજદાર જીગરભાઈ સૂર્યકાંતભાઈ વ્યાસના જણાવ્યા અનુસાર,ચંદાબેન પટેલે સ્થાનિક સ્વરાજ્યની ચૂંટણી દરમિયાન રજૂ કરેલા ચૂંટણી એફિ્ડેવિટમાં પોતાની ઓળખ ડોક્ટર તરીકે આપી હતી. બેલેટ પેપર અને પ્રચાર પ્રસારના તમામ માધ્યમોમાં પણ ‘ડોક્ટર’શબ્દનો પ્રયોગ કરી મતદારોમાં વિશેષ પ્રભાવ અને વિશ્વાસ ઊભો કર્યો હતો.
જોકે,પ્રાથમિક તપાસમાં જાણવા મળ્યું છે કે તેમની પાસે કોઈ માન્ય યુનિવર્સિટી કે સરકાર માન્ય સંસ્થાની ડોકટરી ડિગ્રી મેળવી હોવાની અધિકૃત ડિગ્રી નથી. આ મામલે અરજદારે સ્થાનિક પોલીસ સ્ટેશનમાં કરેલી ફરિયાદમાં જણાવ્યું છે કે,
આરોપીએ જાણીજોઈને ખોટા દસ્તાવેજોનો ઉપયોગ કર્યો છે. આ કૃત્ય બદલ ભારતીય ન્યાય સંહિતા (બીએનએસ) -૨૦૨૩ની કલમ ૩૧૮ (છેતરપિંડી), ૩૩૬ (ખોટા દસ્તાવેજ બનાવવા), ૩૩૮ (નકલી દસ્તાવેજનો સાચા તરીકે ઉપયોગ) અને ૩૪૦ (ખોટી માહિતી આપવી) હેઠળ એફ્.આઈ.આર. નોંધવા માગ કરવામાં આવી છે.
