ચાંદખેડાની SMS હોસ્પિટલમાં POSH એક્ટ અને ‘SHe-BOX’ પોર્ટલ અંગે સેમિનાર યોજાયો
કેન્દ્ર સરકારના ‘SHe-BOX’ પોર્ટલ અને ઓનલાઈન ફરિયાદ પ્રક્રિયા વિશે વિસ્તૃત માહિતી આપવામાં આવી
અમદાવાદ જિલ્લા મહિલા અને બાળ અધિકારીની કચેરી દ્વારા એક પ્રશંસનીય પહેલના ભાગરૂપે ચાંદખેડા સ્થિત SMS હોસ્પિટલ ખાતે એક ખાસ જાગૃતિ સેમિનારનું આયોજન કરવામાં આવ્યું હતું.
હોસ્પિટલમાં કાર્યરત ડૉક્ટર્સ, નર્સિંગ સ્ટાફ, સિક્યુરિટી તેમજ વહીવટી સ્ટાફ માટે “કાર્યસ્થળે મહિલાઓની જાતીય સતામણી (અટકાયત, પ્રતિબંધ અને નિવારણ) અધિનિયમ, 2013 (POSH Act, 2013)” અંતર્ગત આ કાયદાકીય માર્ગદર્શન કાર્યક્રમ યોજાયો હતો.
સેમિનારમાં મુખ્ય વક્તા અને POSH અધિનિયમના નિષ્ણાત શ્રી ગૌરવભાઈ ઠક્કર દ્વારા ઉપસ્થિત સ્ટાફને કાયદાની વિવિધ જોગવાઈઓ વિશે સરળ ભાષામાં સમજણ આપવામાં આવી હતી. તેમણે કાર્યસ્થળે મહિલાઓના અધિકારો, આંતરિક ફરિયાદ સમિતિ (Internal Complaints Committee – ICC)ની રચના અને તેની કામગીરી, તેમજ કોઈ અપ્રિય ઘટના બને તો ફરિયાદ નોંધાવવાની સત્તાવાર પ્રક્રિયા અને કાયદાકીય જવાબદારીઓ વિશે વિગતવાર માહિતી આપી હતી. આ સાથે જ તેમણે દરેક સંસ્થામાં મહિલાઓ માટે સુરક્ષિત, સન્માનજનક અને સંવેદનશીલ વાતાવરણ ઊભું કરવાની અનિવાર્યતા પર ખાસ ભાર મૂક્યો હતો.
આ કાર્યક્રમમાં દહેજ પ્રતિબંધક અધિકારી સુશ્રી વૃતિકા વેગડા પણ ઉપસ્થિત રહ્યા હતા. તેમણે કેન્દ્ર સરકારના ડિજિટલ પ્લેટફોર્મ ‘SHe-BOX’ (Sexual Harrasment electronic-Box) પોર્ટલ વિશે ઉપયોગી માહિતી પૂરી પાડી હતી. કાર્યસ્થળે થતી જાતીય સતામણી સામે મહિલાઓ આ પોર્ટલના માધ્યમથી ઓનલાઈન ફરિયાદ કેવી રીતે નોંધાવી શકે અને આ પોર્ટલ કઈ રીતે મહિલા સુરક્ષામાં મદદરૂપ સાબિત થાય છે, તેનું પ્રાયોગિક માર્ગદર્શન તેમણે આપ્યું હતું.
કાર્યક્રમના અંતમાં એક સંવાદ સત્ર યોજાયું હતું, જેમાં કર્મચારીઓએ ઉત્સાહભેર ભાગ લઈ પોતાની મૂંઝવણો અને પ્રશ્નો રજૂ કર્યા હતા, જેનું નિષ્ણાતો દ્વારા યોગ્ય નિરાકરણ કરવામાં આવ્યું હતું.
અમદાવાદ જિલ્લા મહિલા અને બાળ અધિકારીની કચેરી દ્વારા આયોજિત આ જાગૃતિ કાર્યક્રમ કાર્યસ્થળે મહિલાઓની સુરક્ષા, સન્માન અને સમાનતા સુનિશ્ચિત કરવાની દિશામાં એક અત્યંત મહત્વપૂર્ણ અને સકારાત્મક પગલું સાબિત થયો છે.
આ સેમિનારમાં DHEW (District Hub for Empowerment of Women) ટીમના સભ્યો સહિત હોસ્પિટલના ડૉક્ટરો, નર્સિંગ સ્ટાફ, સુરક્ષા કર્મચારીઓ અને વહીવટી વિભાગના અધિકારી, કર્મચારીઓ હાજર રહ્યા હતા.
