અમદાવાદ, પ્રધાનમંત્રી કિસાન સન્માન નિધિ (PM-KISAN) યોજનાના તમામ લાભાર્થી ખેડૂતો માટે યોજનાનો આગામી હપ્તો મેળવવા માટે જો ઈ-કેવાયસી (e-KYC) બાકી હોય તેવા ખેડૂતોએ ઈ કેવાયસી કરાવવું ફરજિયાત છે. ખેડૂતો પોતાના મોબાઈલ ફોન દ્વારા જ ફેસ ઓથેન્ટિકેશન (ચહેરો વેરીફાય કરીને) પદ્ધતિથી ખૂબ જ સરળતાથી ઈ-કેવાયસી કરી શકે છે.
ખેડૂતો પીએમ કિસાન મોબાઈલ એપ (PM-KISAN Mobile App) નો ઉપયોગ કરીને નીચે મુજબના સરળ સ્ટેપ્સ દ્વારા પોતાનું ઈ-કેવાયસી પૂર્ણ કરી શકશે:
મોબાઈલ એપ પર ઈ-કેવાયસી કરવાની સ્ટેપ-બાય-સ્ટેપ પ્રક્રિયા –
સ્ટેપ ૧: એપ ડાઉનલોડ કરવી- સૌ પ્રથમ તમારા એન્ડ્રોઈડ મોબાઈલના Google Play Store પર જઈને “PM Kisan Mobile App” સર્ચ કરીને ડાઉનલોડ કરો. આ સાથે જ પ્લે સ્ટોર પરથી “Aadhaar FaceRD App” પણ ડાઉનલોડ કરવી જરૂરી છે, જે ચહેરો સ્કેન કરવામાં મદદ કરશે.
સ્ટેપ ૨: એપમાં લોગ-ઈન કરવું –PM Kisan એપ ઓપન કરી, તેમાં આપનો ‘Beneficiary ID’ અથવા ‘Aadhaar Number’ દાખલ કરો. ત્યારબાદ આપના રજિસ્ટર્ડ મોબાઈલ નંબર પર આવેલો OTP દાખલ કરીને લોગ-ઈન કરો. આ સાથે જ ૪ અંકનો વ્યક્તિગત MPIN પણ સેટ કરી લો.
સ્ટેપ ૩: ડેશબોર્ડ અને સ્ટેટસ ચેક કરવું –એપમાં લોગ-ઈન થયા બાદ મુખ્ય ડેશબોર્ડ ખુલશે, જ્યાં ખેડૂત પોતાની વિગતો જોઈ શકશે. અહીં “ECorner” અથવા “e-KYC” ના વિકલ્પ પર ક્લિક કરવાનું રહેશે.
સ્ટેપ ૪: ફેસ ઓથેન્ટિકેશન (ચહેરો સ્કેન કરવો)- હવે એપમાં રહેલા કેમેરા આઇકોન પર ક્લિક કરો. આ સમયે મોબાઈલનો ફ્રન્ટ (સામેનો) કેમેરો ચાલુ થશે.
ખેડૂતે પોતાના ચહેરાને કેમેરાની સામે યોગ્ય લાઈટિંગમાં સ્થિર રાખવાનો રહેશે અને આંખો પલકાવવાની (Blink) રહેશે.
સ્ટેપ ૫: ઈ-કેવાયસી પૂર્ણ થવું – ચહેરો સફળતાપૂર્વક સ્કેન થતાં જ સ્ક્રીન પર “e-KYC is completed successfully” નો મેસેજ પ્રદર્શિત થશે.
અન્ય ખેડૂતોનું પણ ઈ-કેવાયસી કરી શકાશે- આ એપની વિશેષતા એ છે કે કોઈ એક જાગૃત ખેડૂત આ એપના માધ્યમથી પોતાના ગામના અન્ય અન્ય ૧૦૦ જેટલા લાભાર્થી ખેડૂતોના ચહેરા સ્કેન કરીને પણ તેમનું ઈ-કેવાયસી ઘરે બેઠા કરી આપી શકે છે.
સરકાર દ્વારા તમામ પાત્રતા ધરાવતા ખેડૂતોને વિનંતી કરવામાં આવે છે કે ઇ કેવાયસી બાકી હોય તેવા તમામ ખેડૂતોએ સમયસર આ પ્રક્રિયા પૂર્ણ કરી લે જેથી યોજના અંતર્ગત મળનારી આર્થિક સહાયનો હપ્તો કોઈપણ અડચણ વિના સીધો બેંક ખાતામાં જમા થઈ શકે.
