તાલિબાન-પાકિસ્તાન તણાવ: અફઘાનિસ્તાન અને પાકિસ્તાનમાં તણાવ ચરમ પર છે. યુદ્ધવિરામ લંબાવવામાં આવ્યો હોવા છતાં પણ સમયાંતરે સંઘર્ષના કિસ્સાઓ પ્રકાશમાં આવે છે. દરમિયાન તહરીક-એ-તાલિબાન પાકિસ્તાન (TTP અથવા પાકિસ્તાની તાલિબાન) એ પાકિસ્તાની આર્મી ચીફ અસીમ મુનીરને ધમકી આપી છે. પાકિસ્તાની તાલિબાને મુનીરને કહ્યું છે કે જો તમે માણસ છો તો અમારો સામનો કરો. ટીટીપી દ્વારા સામે આવેલા વીડિયોમાં તેનો કમાન્ડર કહે છે કે તેના સૈનિકોને મરવા માટે મોકલવાને બદલે મુનીરે તેના ટોચના અધિકારીઓને યુદ્ધના મેદાનમાં મોકલવા જોઈએ.
NDTVના જણાવ્યા અનુસાર, તમામ વીડિયોમાં ખૈબર પખ્તુનખ્વાના કુર્રમ વિસ્તારમાં 8 ઓક્ટોબરે થયેલા હુમલાના ફૂટેજ પણ સામેલ છે. જેમાં TTPએ 22 પાકિસ્તાની સૈનિકોને મારી નાખ્યા હતા, જેનાથી ખળભળાટ મચી ગયો હતો. જો કે, પાકિસ્તાને સંખ્યા છુપાવીને માત્ર 11 સૈનિકોની હત્યા સ્વીકારી હતી. એક વીડિયોમાં ટીટીપીનો એક વરિષ્ઠ કમાન્ડર, કમાન્ડર કાઝિમ તરીકે ઓળખાય છે, જે પાકિસ્તાન આર્મી ચીફ મુનીરને ધમકી આપતો જોવા મળે છે.
વીડિયોમાં કાઝિમ કહે છે કે, જો તમે માણસ છો તો અમારો સામનો કરો. તે વીડિયોમાં આગળ કહે છે કે જો તમે તમારી માતાનું દૂધ પીધું હોય તો અમારી સાથે લડાઈ કરો. આ વીડિયોથી પાકિસ્તાની સેનામાં ખળભળાટ મચી ગયો છે. પાકિસ્તાને કાઝિમ પર 10 કરોડ રૂપિયા (પાકિસ્તાની રૂપિયા)નું ઈનામ રાખ્યું છે. એવું માનવામાં આવે છે કે કાઝિમ તાજેતરમાં લેફ્ટનન્ટ કર્નલ અને પાક આર્મીના મેજરની હત્યામાં સામેલ હતો.
એક પાકિસ્તાની અધિકારીએ જણાવ્યું કે, કાઝિમ, જે કુર્રમ જિલ્લાનો છે, તે પારાચિનાર જઈ રહેલા સૈન્ય કાફલાઓ અને શિયા સમુદાયના વાહનો પર હુમલા પાછળ પણ હતો. તેના પર કુર્રમના ડેપ્યુટી કમિશનર જાવેદુલ્લા મહેસૂદની હત્યાના પ્રયાસનું કાવતરું ઘડવાનો પણ આરોપ છે. પાકિસ્તાન અને અફઘાનિસ્તાન વચ્ચે 2023 થી સંબંધો ખરાબ છે, પરંતુ હવે વધુ તણાવ ઉભો થયો છે. ઈસ્લામાબાદ વારંવાર ચિંતા વ્યક્ત કરી રહ્યું છે કે આતંકવાદીઓ સરહદ પારથી હુમલા કરવા માટે અફઘાન જમીનનો ઉપયોગ કરી રહ્યા છે.
