રાંચી ODI દરમિયાન ICC કોડ ઓફ કન્ડક્ટના લેવલ 1નો ભંગ કરવા બદલ ભારતીય ઝડપી બોલર હર્ષિત રાણાના ખાતામાં એક ડીમેરિટ પોઈન્ટ ઉમેરવામાં આવ્યો છે. રાણાએ સાઉથ આફ્રિકાના બેટ્સમેન ડીવાલ્ડ બ્રેવિસને આઉટ કર્યા બાદ ડ્રેસિંગ રૂમ તરફ ઈશારો કર્યો હતો, જેના કારણે આઈસીસીએ રાણા વિરુદ્ધ આ અનુશાસનાત્મક કાર્યવાહી કરીને તેને ઠપકો આપ્યો છે.
આઈસીસી દ્વારા જારી કરવામાં આવેલી એક મીડિયા રીલીઝમાં કહેવામાં આવ્યું છે કે રાણાને ખેલાડીઓ અને ખેલાડીઓના સપોર્ટ કર્મચારીઓ સંબંધિત આઈસીસી આચાર સંહિતાની કલમ 2.5નો ભંગ કરવા બદલ દોષી ઠેરવવામાં આવ્યો હતો. જે “અપમાનજનક ભાષા, ક્રિયાઓ અથવા હાવભાવનો ઉપયોગ કરવા અથવા આંતરરાષ્ટ્રીય મેચ દરમિયાન જ્યારે બેટ્સમેન આઉટ થાય ત્યારે તેની આક્રમક પ્રતિક્રિયા ઉશ્કેરવા સાથે સંબંધિત છે.”
આ ઘટના દક્ષિણ આફ્રિકાની ઇનિંગની 22મી ઓવર દરમિયાન બની જ્યારે રાણાએ બ્રેવિસને આઉટ કર્યો. રાણાએ મેચ રેફરી રિચી રિચાર્ડસન દ્વારા પ્રસ્તાવિત સજાને સ્વીકારી લીધી, જેના પરિણામે મામલાને ઔપચારિક સુનાવણીની જરૂર ન રહી. 24 મહિનાના સમયગાળામાં રાણાનો આ પહેલો ગુનો હતો તેથી તેના ખાતામાં એક ડિમેરિટ પોઈન્ટ ઉમેરવામાં આવ્યો હતો.
લેવલ 1 ભંગ માટે લઘુત્તમ સજા ઔપચારિક ઠપકો છે, જ્યારે મહત્તમ સજા મેચ ફીમાં એક કે બે ડિમેરિટ પોઈન્ટ્સ સાથે 50% કપાત હોઈ શકે છે. હાલમાં ભારત અને દક્ષિણ આફ્રિકા વચ્ચે વનડે શ્રેણી ચાલી રહી છે, જેમાં ભારત 1-0થી આગળ છે. ભારતે રાંચી ODIમાં દક્ષિણ આફ્રિકાને 17 રને હરાવ્યું હતું, જ્યારે શ્રેણીની બીજી ODI બુધવારે રાયપુરમાં રમાઈ રહી છે.
