દક્ષિણ આફ્રિકાએ ગુવાહાટી ટેસ્ટમાં ભારતને 408 રનના વિશાળ અંતરથી હરાવ્યું છે. રનના મામલામાં ભારતની આ અત્યાર સુધીની સૌથી મોટી હાર છે. આ રીતે દક્ષિણ આફ્રિકાએ બે ટેસ્ટ મેચની શ્રેણીમાં ક્લીન સ્વીપ કરીને 2-0થી જીત મેળવી છે. છેલ્લી 3 ઘરઆંગણે શ્રેણીમાં ભારતની આ બીજી શ્રેણીની હાર છે. ન્યૂઝીલેન્ડે 3-0થી હરાવ્યું હતું અને હવે દક્ષિણ આફ્રિકાને 2-0થી હરાવ્યું છે. આ સાથે જ ભારત વર્લ્ડ ટેસ્ટ ચેમ્પિયનશિપ રેન્કિંગમાં ચોથાથી પાંચમા સ્થાને આવી ગયું છે. 66 વર્ષ બાદ ભારતને ઘરઆંગણે 7માંથી 5 ટેસ્ટમાં હારનો સામનો કરવો પડ્યો છે.
મુખ્ય કોચ ગૌતમ ગંભીરના કાર્યકાળ દરમિયાન, ભારતને ઘરઆંગણે રમાયેલી છેલ્લી 7 ટેસ્ટ મેચમાંથી 5માં હારનો સામનો કરવો પડ્યો છે. એક સમયે ઘરઆંગણે અજેય ગણાતી ભારતીય ટીમ હવે પોતાની જ ધરતી પર મજબૂત ટીમો સામે મેચ પણ ડ્રો કરી શકતી નથી, જીતવાની વાત તો છોડો. ગંભીરના કાર્યકાળ દરમિયાન ભારતે માત્ર બાંગ્લાદેશ અને વેસ્ટ ઈન્ડિઝ સામે ઘરઆંગણે શ્રેણી જીતી છે.
ગુવાહાટી ટેસ્ટની વાત કરીએ તો દક્ષિણ આફ્રિકાએ ભારતને જીતવા માટે 549 રનનો વિશાળ ટાર્ગેટ આપ્યો હતો, પરંતુ પાંચમા દિવસે બીજા સેશનમાં ભારતીય દાવ માત્ર 140 રન પર સમેટાઈ ગયો હતો. આ મેચમાં પ્રથમ બેટિંગ કરતા દક્ષિણ આફ્રિકાએ પ્રથમ દાવમાં 489 રનનો વિશાળ સ્કોર બનાવ્યો હતો. જવાબમાં ભારતીય ટીમ પ્રથમ દાવમાં 201 રનમાં ઓલઆઉટ થઈ ગઈ હતી. જે બાદ દક્ષિણ આફ્રિકાએ 5 વિકેટના નુકસાને 260 રન પર પોતાનો બીજો દાવ ડિકલેર કર્યો હતો અને ભારતને જીતવા માટે 549 રનનો ટાર્ગેટ આપ્યો હતો. ભારતીય ટીમ બીજા દાવમાં 140 રનમાં સમેટાઈ ગઈ હતી અને 408 રનથી હારી ગઈ હતી. પ્રથમ દાવમાં 6 અને બીજી ઈનિંગમાં 1 વિકેટ લેનાર દક્ષિણ આફ્રિકાના ફાસ્ટ બોલર માર્કો જેન્સનને પ્લેયર ઓફ ધ મેચ તરીકે પસંદ કરવામાં આવ્યો હતો.
ટેસ્ટ ક્રિકેટના ઈતિહાસમાં કોઈપણ પ્રતિસ્પર્ધી સામે રનના તફાવતની દ્રષ્ટિએ ભારતની આ સૌથી મોટી હાર છે. આ પહેલા 2004માં ભારતને ઓસ્ટ્રેલિયા સામે 342 રનથી હારનો સામનો કરવો પડ્યો હતો.
