જયસુખ જીવાણીની ગેંગ નકલી શેર ટ્રેડિંગ એપ્લીકેશનથી લોકોને ઠગતી હતી

(એજન્સી)અમદાવાદ,શહેરમાં શેરબજારમાં રોકાણના નામે નિર્દોષ નાગરિકો સાથે લાખો-કરોડો રૂપિયાની છેતરપિંડી આચરતી સાયબર ગેંગનો અમદાવાદ સાયબર ક્રાઈમ બ્રાન્ચે પર્દાફાશ કર્યો છે. પોલીસે આ ગુનામાં સંડોવાયેલા જયસુખભાઈ જીવાણી નામના શખ્સની સુરતથી ધરપકડ કરી છે.

પ્રાથમિક તપાસમાં આ ઠગબાજે નકલી ટ્રેડિંગ એપ્લિકેશન દ્વારા રોકાણકારોને જાળમાં ફસાવી અંદાજે રૂ.૫૫ લાખથી વધુની છેતરપિંડી આચરી હોવાનું સામે આવ્યું છે.

પોલીસ તપાસમાં બહાર આવેલી વિગતો મુજબ, આરોપી જયસુખ જીવાણી અને તેની ગેંગ અત્યંત વ્યવસ્થિત રીતે મોડસ ઓપરેન્ડી ચલાવતા હતા. આ ટોળકી વોટ્‌સએપ પર ગ્રુપ બનાવી લોકોનો સંપર્ક કરતી હતી. રોકાણકારોનો વિશ્વાસ જીતવા માટે તેઓ શરૂઆતમાં શેરબજારની ટિપ્સ આપતા અને ત્યારબાદ એક નકલી ટ્રેડિંગ એપ્લિકેશન ડાઉનલોડ કરાવતા હતા.

તેઓ વોટ્સએપ પર “GOLD MEMBER GROUP-IEF” નામે ગ્રુપ બનાવી લોકોનો સંપર્ક કરતા હતા. રોકાણકારોનો વિશ્વાસ જીત્યા બાદ તેઓને એક નકલી ટ્રેડિંગ એપ ડાઉનલોડ કરાવતા હતા, જેમાં વર્ચ્યુઅલ રીતે મોટો નફો થતો દેખાતો હતો.

નકલી એપમાં રોકાણકારોને વર્ચ્યુઅલ રીતે મોટો નફો થતો દેખાડવામાં આવતો હતો. આ આંકડાકીય માયાજાળ જોઈ રોકાણકારો વધુ રકમ રોકવા લલચાતા હતા. જેવું રોકાણકાર મોટી રકમ ટ્રાન્સફર કરે, કે તુરંત જ તે રકમ અલગ-અલગ બેંક ખાતાઓમાં ફેરવીને હડપી લેવામાં આવતી હતી.

સાયબર ક્રાઈમ બ્રાન્ચે ટેકનિકલ એનાલિસિસ અને ડિજિટલ ફૂટપ્રિન્ટ્‌સના આધારે તપાસ હાથ ધરી સુરતમાંથી જયસુખની ધરપકડ કરી છે. તેની પૂછપરછમાં અનેક ચોંકાવનારા ખુલાસા થવાની શક્યતા છે. પોલીસે આ ગુનામાં વપરાયેલા તમામ શંકાસ્પદ બેંક ખાતાઓને ફ્રીઝ કરી દીધા છે.

આ છેતરપિંડીમાં માત્ર જયસુખ જ નહીં પરંતુ અન્ય મોટા માથાઓની સંડોવણી હોવાની આશંકા સેવાઈ રહી છે. અમદાવાદ સાયબર ક્રાઈમે અન્ય સાગરીતોને પકડવા માટે અલગ-અલગ ટીમો બનાવી તપાસ તેજ કરી છે. પોલીસને આશંકા છે કે આ ગેંગે ગુજરાત સહિત અન્ય રાજ્યોના અનેક રોકાણકારોને પણ લાખોનો ચૂનો લગાવ્યો હોઈ શકે છે.