અમદાવાદ, અમદાવાદના રામોલ વિસ્તારમાં શાકભાજી લઈને ઘરે પરત જઈ રહેલાં એક વૃદ્ધાને ઠગ મહિલા ટોળકીએ અટકાવીને રૂ. ૨.૭૫ લાખની કિંમતના દાગીના પડાવી લીધા હતા.
ઠગ મહિલાઓએ વૃદ્ધાને પોતાની જાળમાં ફસાવવા માટે જણાવ્યું હતું કે, “અમારી બહેન ચોરીના રૂપિયા લેવાનો ઇનકાર કરી રહી છે, તમે વડીલ છો, જો તમે આવીને તેને સમજાવશો તો કદાચ તે માની જશે.”ત્યારબાદ, “તમે તમારા આભૂષણો થોડીવાર માટે અમને આપો” તેમ કહીને ટોળકીએ વૃદ્ધા પાસેથી સોનાના દાગીના લઈ લીધા હતા. તેના બદલામાં કાગળના ટુકડા અને પ્લાસ્ટિકની બંગડીઓ ભરેલી બે પોટલીઓ પધરાવીને ત્રણેય ઠગ મહિલાઓ પલાયન થઈ ગઈ હતી.
છેતરાયા હોવાનો અહેસાસ થતાં વૃદ્ધાએ પરિવારના સભ્યોને જાણ કરી હતી અને આ અંગે પોલીસ મથકે ફરિયાદ નોંધાવી છે.વસ્ત્રાલમાં ૬૮ વર્ષીય વૃદ્ધા પરિવાર સાથે રહે છે. દસ દિવસ પૂર્વે તેઓ શાકભાજી લઈને ઘરે પરત ફરી રહ્યા હતા તે સમયે ત્રણ અજાણી મહિલાએ તેમને બૂમ પાડીને અટકાવ્યા હતા.
મહિલાઓએ વૃદ્ધાની નજીક આવીને કહ્યું કે, “અમે ત્રણેય બહેનોએ અમારા શેઠના ઘરેથી રોકડ રકમની ચોરી કરી છે અને મારી બહેનને બિહાર જવાનું છે. અમે તેને રૂ. ૫,૦૦૦ આપીએ છીએ પરંતુ તે સ્વીકારતી નથી. તમે વડીલ છો તો તેને સમજાવો.” આ રીતે વાતોમાં લલચાવીને ઠગ મહિલાઓએ વૃદ્ધાને વિશ્વાસમાં લીધા હતા.
ત્યારબાદ ત્રણેય મહિલાઓ વૃદ્ધાને રતનપુરા ગામ પાસે લઈ ગઈ હતી, જ્યાં અગાઉથી જ એક અન્ય મહિલા ઉપસ્થિત હતી. ત્યાં એક ઠગ મહિલાએ સિલાઈ કરેલી કાપડની થેલીમાંથી રૂ. ૫૦૦ની નોટ કાઢીને વૃદ્ધાને બતાવી હતી અને કહ્યું હતું કે, “આ બંડલ તમે તમારી પાસે રાખો જેથી મારી બહેનને વિશ્વાસ આવે.
તમે પહેરેલા આભૂષણો થોડીવાર માટે મને આપો, હું તેને બતાવીશ કે આ દાગીના મેં ખરીદ્યા છે, જેથી તે મારી પાસેથી રૂપિયા લેવા તૈયાર થાય.”આમ, વાતોમાં ફસાવીને ઠગ મહિલાઓએ વૃદ્ધા પાસેથી રૂ. ૨.૭૫ લાખની કિંમતના આભૂષણો મેળવી લીધા હતા. થોડીવાર પછી એક મહિલા પરત આવી અને વૃદ્ધાને રૂમાલમાં બાંધેલું અન્ય એક બંડલ આપતા કહ્યું કે, “આમાં તમારા તમામ આભૂષણો છે.”
ત્યારબાદ “હું મારી બહેનોને વળાવીને આવું છું” તેમ કહીને ત્રણેય મહિલાઓ ત્યાંથી જતી રહી હતી. વૃદ્ધાએ થેલીમાં રહેલું બંડલ ખોલીને જોયું તો તેમાંથી માત્ર કાગળો નીકળ્યા હતા અને બીજા બંડલમાંથી પ્લાસ્ટિકની બંગડીઓ મળી આવી હતી. આ જોઈ ગભરાઈ ગયેલા વૃદ્ધાએ તુરંત પરિવારને જાણ કરી હતી. રામોલ પોલીસે આ મામલે ત્રણ અજાણી મહિલાઓ વિરુદ્ધ ગુનો નોંધીને તેમની શોધખોળ હાથ ધરી છે.SS1MS
