(એજન્સી)અમદાવાદ, અમદાવાદ ડિટેક્શન ઓફ ક્રાઈમ બ્રાન્ચે એક ૨૭ વર્ષીય યુવકની ધરપકડ કરી છે. જે ઓનલાઈન મેટ્રિમોનિયલ અને ડેટિંગ પ્લેટફોર્મ પર ગુજરાત પોલીસના સાયબર સેલના પીએસઆઈ તરીકે ઓળખ આપી મહિલાઓને પ્રેમજાળમાં ફસાવતો હતો. આ ભેજાબાજ યુવક AI ટૂલ્સ અને કમ્પ્યુટર સોફ્ટવેરની મદદથી નકલી ઓળખપત્રો બનાવીને મહિલાઓ પાસેથી પૈસા અને અન્ય સુવિધાઓ પડાવતો હતો.
પકડાયેલા આરોપીની ઓળખ હિમાંશુ ઉર્ફે રોકી પંચાલ (ઉંમર ૨૭ વર્ષ) તરીકે થઈ છે. જે યોગેશભાઈ ચમનલાલ પંચાલનો પુત્ર છે. તે મૂળ રાજસ્થાનના ઉદયપુરનો વતની છે અને હાલ અમદાવાદના સાબરમતી વિસ્તારમાં રહેતો હતો.
મેટ્રિમોનિયલ એપ્સનો ઉપયોગ કરીને આરોપીએ પ્રખ્યાત ડેટિંગ તેમજ લગ્ન માટેની એપ્સ પર રોકી પંચાલ નામે ફેક આઈડી બનાવ્યા હતા. મહિલાઓને પ્રભાવિત કરવા અને તેમનો ભરોસો જીતવા માટે તે AI દ્વારા જનરેટ કરેલા ફોટાનો ઉપયોગ કરતો હતો. જેમાં તે પોલીસ યુનિફોર્મમાં દેખાતો હતો.
તે કેન્વા એપ અને ડિજિટલ સ્ટેમ્પ-સિગ્નેચર મેકર ટૂલ્સનો ઉપયોગ કરીને ગવર્મેન્ટ ઓફ ઈન્ડિયા અને ક્રાઈમ બ્રાન્ચ સાયબર સિક્યોરિટી લખેલા આબેહૂબ નકલી ઓળખપત્રો તૈયાર કરતો હતો.
મહિલાઓ સામે એવો ડોળ કરતો હતો કે તે ગુજરાત પોલીસની ક્રાઈમ બ્રાન્ચના સાયબર સિક્યોરિટી વિંગમાં પીએસઆઈ તરીકે ફરજ બજાવે છે. રોમેન્ટિક રિલેશનશિપમાં ફસાવ્યા બાદ તે અલગ-અલગ બહાને મહિલાઓ પાસેથી મોટી રકમ ખંખેરી લેતો હતો.
ક્રાઈમ બ્રાન્ચે આરોપી હિમાંશુ ઉર્ફે રોકીની ધરપકડ કરીને તેની પાસેથી ઓપ્પો કંપનીનો મોબાઈલ ફોન. ૪૦,૦૦૦ રૂપિયા રોકડા, પોલીસ યુનિફોર્મવાળો ફોટો, ગુજરાત પોલીસનો લોગો અને બેજ ધરાવતું નકલી આઈડી કાર્ડ, પોલીસનો લાલ બેલ્ટ અને અશોક સ્તંભના પ્રતીકવાળા સ્ટિકર્સ સહિતની સામગ્રી જપ્ત કરી છે.
ક્રાઈમ બ્રાન્ચના અધિકારીઓના જણાવ્યા મુજબ, આ નકલી પીએસઆઈએ અત્યાર સુધી કેટલી મહિલાઓને શિકાર બનાવી છે અને તેની સામે અન્ય કોઈ સાયબર ફ્રોડ કે છેતરપિંડીના ગુના નોંધાયેલા છે કે નહીં તે દિશામાં સઘન પૂછપરછ અને તપાસ હાથ ધરવામાં આવી છે.
