ઓસ્ટ્રેલિયાના ફાસ્ટ બોલર મિચેલ સ્ટાર્કે ગુરુવારે ઈંગ્લેન્ડ સામેની બીજી ટેસ્ટ મેચ દરમિયાન એક મોટી સિદ્ધિ હાંસલ કરી હતી. ફાસ્ટ બોલર સ્ટાર્ક વર્તમાન એશિઝ શ્રેણીમાં શાનદાર ફોર્મમાં છે. પર્થમાં પ્રથમ ટેસ્ટમાં 10 વિકેટ લેનાર સ્ટાર્કે બીજી મેચમાં પણ સારી શરૂઆત કરી છે. મિચેલ સ્ટાર્કે પિંક બોલ ટેસ્ટના પહેલા દિવસે ડિનર બ્રેક સુધી ત્રણ વિકેટ ઝડપી છે અને આ સાથે મિચેલ સ્ટાર્ક ટેસ્ટ ક્રિકેટના ઈતિહાસમાં ડાબોડી બોલર તરીકે સૌથી વધુ વિકેટ લેનાર બોલર બની ગયો છે. તેણે પાકિસ્તાનના મહાન વસીમ અકરમને પાછળ છોડી દીધો.
સ્ટાર ફાસ્ટ બોલર મિચેલ સ્ટાર્કે ગુરુવારે ઈંગ્લેન્ડ સામેની બીજી ટેસ્ટમાં બેન ડકેટ, ઓલી પોપ અને હેરી બ્રુકને પેવેલિયનનો રસ્તો બતાવ્યો છે. હેરી બ્રુકને આઉટ કરીને સ્ટાર્કે મોટી સિદ્ધિ મેળવી હતી. ડાબા હાથના બોલર તરીકે, તે ટેસ્ટમાં સૌથી વધુ વિકેટ લેનાર બોલર બન્યો. સ્ટાર્કે ટેસ્ટમાં 415 વિકેટ લીધી છે. તેણે પાકિસ્તાનના દિગ્ગજ ખેલાડી વસીમ અકરમનો રેકોર્ડ તોડી નાખ્યો, જેના નામે 414 વિકેટ છે. ચામિંડા વાસ આ યાદીમાં 355 વિકેટ સાથે ત્રીજા સ્થાને છે. ન્યુઝીલેન્ડના ફાસ્ટ બોલર ટ્રેન્ટ બોલ્ટના નામે 317 વિકેટ છે. ભારતના દિગ્ગજ ઝડપી બોલર ઝહીર ખાને ટેસ્ટમાં 311 વિકેટ લીધી છે.
મિચેલ સ્ટાર્ક વર્તમાન એશિઝ શ્રેણીમાં સૌથી વધુ વિકેટ લેનાર બોલર છે. તેણે અત્યાર સુધી ત્રણ ઇનિંગ્સમાં 13 વિકેટ ઝડપી છે. બીજા સ્થાને ઓસ્ટ્રેલિયાનો ફાસ્ટ બોલર બ્રેન્ડન ડેગેટ છે જેણે ત્રણ ઇનિંગ્સમાં 5 વિકેટ ઝડપી છે. ઈંગ્લેન્ડ તરફથી કેપ્ટન બેન સ્ટોક્સે સૌથી વધુ વિકેટ લીધી છે. તેણે બે ઇનિંગ્સમાં 5 વિકેટ લીધી છે. ઓસ્ટ્રેલિયાએ પ્રથમ ટેસ્ટ માત્ર બે દિવસમાં જીતી લીધી હતી. ઈંગ્લેન્ડની ટીમને પ્રથમ મેચમાં 8 વિકેટે હારનો સામનો કરવો પડ્યો હતો.
