પાકિસ્તાન ક્રિકેટ બોર્ડની પસંદગી સમિતિ શ્રીલંકામાં 7 થી 11 જાન્યુઆરી દરમિયાન યોજાનારી ત્રણ મેચની T20 શ્રેણી માટે તેની ટીમમાં કેટલાક નવા ચહેરાઓનો સમાવેશ કરી શકે છે. કારણ કે PCBએ ઓસ્ટ્રેલિયામાં 14 ડિસેમ્બરથી 15 જાન્યુઆરી સુધી ચાલનારી બિગ બેશ લીગમાં રમવા માટે છ મુખ્ય ખેલાડીઓને NOC જારી કર્યા છે. આ પછી જ તેણે શ્રીલંકા પ્રવાસનો પ્લાન બનાવ્યો.
આ પહેલીવાર છે જ્યારે પાકિસ્તાનના આટલા ખેલાડીઓ BBLમાં રમશે. આ ખેલાડીઓમાં બાબર આઝમ, શાહીન શાહ આફ્રિદી, મોહમ્મદ રિઝવાન, હસન અલી, હરિસ રઉફ અને શાદાબ ખાનનો સમાવેશ થાય છે. રિઝવાન સિવાય અન્ય તમામ ખેલાડીઓ ટી-20માં પાકિસ્તાનની ટીમ તરફથી રમી રહ્યા છે.
પોતાની ટીમોને પાકિસ્તાની ખેલાડીઓને સાઇન કરવાની મંજૂરી આપતા પહેલા ક્રિકેટ ઓસ્ટ્રેલિયાએ સ્પષ્ટ કરી દીધું હતું કે તેઓ આખી સિઝન માટે ઉપલબ્ધ રહેશે. એક વિશ્વસનીય સૂત્રએ કહ્યું, “ક્રિકેટ ઓસ્ટ્રેલિયા અને PCB વચ્ચે એ વાત પર સહમતિ થઈ હતી કે પાકિસ્તાને ડિસેમ્બરમાં કોઈ આંતરરાષ્ટ્રીય મેચ રમવાની નથી અને ખેલાડીઓ જાન્યુઆરીના છેલ્લા અઠવાડિયા સુધી આખી બિગ બેશ ટૂર્નામેન્ટ રમી શકશે. પરંતુ હવે પરિસ્થિતિ બદલાઈ ગઈ છે.
પીસીબીએ ફખર ઝમાન, હસન નવાઝ અને નસીમ શાહને પણ અમીરાત લીગમાં રમવાની મંજૂરી આપી છે, પરંતુ ટૂર્નામેન્ટ શ્રીલંકામાં સિરીઝ પહેલા ખતમ થઈ જશે. ભૂતપૂર્વ ODI અને T20 ટીમના કેપ્ટન રિઝવાનને ડિસેમ્બર 2024 થી રાષ્ટ્રીય પસંદગીકારો દ્વારા સૌથી ટૂંકા ફોર્મેટ માટે રાષ્ટ્રીય ટીમમાં પસંદ કરવામાં આવ્યો નથી અને આવી સ્થિતિમાં ખેલાડી BBLને એક મોટી તક તરીકે જોઈ રહ્યો છે. રિઝવાને પત્રકારો સાથેની વાતચીતમાં કહ્યું કે, મને બિગ બેશમાં સારું પ્રદર્શન કરવાનો વિશ્વાસ છે અને જો તમે ઓસ્ટ્રેલિયામાં સારું પ્રદર્શન કરશો તો બધાનું ધ્યાન તમારી તરફ જાય છે.
