થલતેજ, સાબરમતી, પાલડી સહિત 17 મેટ્રો સ્ટેશન પાસે પાર્કિંગ પ્લોટની ફાળવણી
(પ્રતિનિધિ) અમદાવાદ, અમદાવાદ શહેરમાં દિન પ્રતિદિન ટ્રાફિકની સમસ્યા વધી રહી છે. ખાસ કરીને પાર્કિંગની સમસ્યા જોવા મળી રહી છે. વડાપ્રધાન નરેન્દ્ર મોદી દ્વારા ઇંધણની બચત કરવા લોકોને જાહેર પરિવહન સેવાનો ઉપયોગ કરવા અપીલ કરી છે ત્યારે શહેરના મેટ્રો સ્ટેશન આસપાસ લોકો પોતાના વાહનો મૂકી અને મેટ્રો સ્ટેશન પર જઈ શકે
ત્યારે મ્યુનિસિપલ કોર્પોરેશન દ્વારા વસ્ત્રાલ, સાબરમતી, થલતેજ સહિતના મેટ્રો સ્ટેશન નજીક 100 મીટરથી લઈને 500 મીટર દૂર પાર્કિંગ પ્લોટ શોધવામાં આવ્યા છે. મેટ્રોનો લોકો ઉપયોગ વધારે કરે તેના માટે આ પાર્કિંગ પ્લોટ શોધવા અગાઉ પણ સૂચના આપી હતી જેના પગલે હવે આ પાર્કિંગ પ્લોટ ને ડેવલોપ કરી લોકો મફતમાં પાર્કિંગ કરી શકે તે પ્રકારે આયોજન હાથ ધરવામાં આવ્યું છે.
મ્યુનિસિપલ કોર્પોરેશનના એસ્ટેટ વિભાગના અધિકારીના જણાવ્યા મુજબ મ્યુનિસિપલ કોર્પોરેશન દ્વારા શહેરમાં પાર્કિંગની સમસ્યાને લઈને અલગ અલગ જગ્યાએ પાર્કિંગ પ્લોટો તૈયાર કરવામાં આવી રહ્યા છે.
જાહેર પરિવહનની સેવા એવી મેટ્રો નો ઉપયોગ લોકો હવે વધારે કરી રહ્યા છે ત્યારે મેટ્રો સ્ટેશન નજીક લોકોને પાર્કિંગ મળી રહે તેના માટે પૂર્વ અને પશ્ચિમ વિસ્તારના મેટ્રો સ્ટેશન નજીક કોર્પોરેશનના રિઝર્વ પ્લોટને પાર્કિંગ માટે ફાળવવાનો નિર્ણય લેવામાં આવ્યો છે. શહેરના સાબરમતી, વસ્ત્રાલ, થલતેજ, વાસણા APMC સહિતના અલગ અલગ મેટ્રો સ્ટેશન નજીક પાર્કિંગ માટે પ્લોટ શોધવામાં આવ્યા છે.
નાગરિકો પોતાના વાહનો મેટ્રો સ્ટેશન પાસે મૂકી અને ટ્રેનમાં જઈ શકે તેના માટે મેટ્રો સ્ટેશનથી 100 મીટર અને 500 મીટર સુધીના વિસ્તારમાં પ્લોટ શોધવામાં આવ્યા છે. સાબરમતી મેટ્રો સ્ટેશનથી માત્ર 120 મીટર, પાલડી સ્ટેશનથી 100 મીટર, એપરલ પાર્કથી 100 મીટર, થલતેજ મેટ્રો સ્ટેશનથી ખૂબ જ નજીકમાં આ પ્લોટ આવેલા છે જ્યાં લોકો હવે પોતાના વાહનો પાર્ક કરી શકશે.
મ્યુનિસિપલ કોર્પોરેશન દ્વારા આ પ્લોટ શોધવામાં આવ્યા છે. આ તમામ પ્લોટમાં લોકો વ્યવસ્થિત પાર્કિંગ કરી શકે તેના માટે તેમાં પેવર બ્લોક પણ નાખવામાં આવશે.
મ્યુનિસિપલ કોર્પોરેશનના એસ્ટેટ વિભાગના અધિકારી જીતેન્દ્ર મકવાણાએ જણાવ્યું હતું કે મેટ્રો સ્ટેશન નજીક લોકો પાર્કિંગ કરી શકે તેના માટેના પ્લોટ ને અમે શોધ્યા છે અને હાલમાં 17 જેટલા પ્લોટ શોધવામાં આવ્યા છે જ્યાં લોકો વ્યવસ્થિત રીતે પાર્કિંગ કરી શકે તેના માટે પેવર બ્લોક નાખવામાં આવશે.
પાર્કિંગના સાઇનેજીસ અને સીસીટીવી પણ લગાવવાની પ્રક્રિયા કરવામાં આવશે ટૂંક સમયમાં આ તમામ પ્રક્રિયા કરીને પાર્કિંગ પ્લોટ તૈયાર કરવામાં આવશે કેટલાક પ્લોટમાં લોકોએ પાર્કિંગ પણ શરૂ કરી દીધું છે.
