મુખ્ય સલાહકાર મોહમ્મદ યુનુસની આગેવાની હેઠળની બાંગ્લાદેશની વચગાળાની સરકાર પણ જોખમમાં છે. સમાચાર છે કે આ સરકારને સ્થાપિત કરવામાં મદદ કરનાર ઈન્કલાબ મંચ તેને હટાવવા માટે આંદોલન શરૂ કરી શકે છે. જોકે, આખરી નિર્ણય લેવાનો બાકી છે. સંગઠનના પ્રવક્તા ઉસ્માન હાદીના મોત બાદ હત્યારાને પકડવાના પ્રયાસો ચાલુ છે. ઈન્કલાબ મંચે કહ્યું છે કે તે ફરી વિરોધ શરૂ કરશે.
મીડિયા રિપોર્ટ્સ અનુસાર, આ ચેતવણી રવિવારે આપવામાં આવેલા 24 કલાકના અલ્ટિમેટમ બાદ આવી છે. તે અલ્ટીમેટમ બાદ પણ પોલીસ દ્વારા કોઈ મોટી કાર્યવાહી કરવામાં આવી ન હતી. ઈન્કલાબ મંચના અધિકારી અબ્દુલ્લા અલ જાબેરે જણાવ્યું હતું કે, ‘આરોપીની ધરપકડ અંગે ગૃહ સલાહકાર અથવા સંબંધિત અધિકારીઓ દ્વારા કોઈ સીધી કાર્યવાહી કર્યા વિના સમયમર્યાદા પસાર થઈ ગઈ છે.’
તેમણે કહ્યું હતું કે ઢાકામાં સોમવારે બપોરે 3 વાગ્યાથી વિરોધ પ્રદર્શન શરૂ થશે. એવું પણ કહેવામાં આવ્યું હતું કે તે દરમિયાન તે નક્કી કરવામાં આવશે કે યુનુસ પ્રશાસનને સમર્થન આપવું કે ‘તેને હટાવવા માટે આંદોલન શરૂ કરવું.’ તેમણે આરોપ લગાવ્યો હતો કે તાજેતરના મંત્રાલયની બ્રીફિંગમાં ગૃહ સલાહકાર અને તેમના વિશેષ સચિવની ગેરહાજરી એ ઘટનાને ઓછી દર્શાવવાનો પ્રયાસ હતો.
અન્ય વિદ્યાર્થીને ગોળી મારી
હિંસક 2024 વિદ્યાર્થીઓની આગેવાની હેઠળની ચળવળના બીજા નેતા મોતાલેબ સિકદરને સોમવારે બાંગ્લાદેશના દક્ષિણ પશ્ચિમ શહેર ખુલનામાં અજાણ્યા બંદૂકધારીઓ દ્વારા માથામાં ગોળી મારી દેવામાં આવી હતી. આ હુમલો અગ્રણી યુવા નેતા શરીફ ઉસ્માન હાદીની હત્યાના દિવસો બાદ થયો છે.
NCP (નેશનલ સિટિઝન પાર્ટી)ના સંયુક્ત મુખ્ય સંયોજક મહમુદા મીતુએ ફેસબુક પર એક પોસ્ટમાં જણાવ્યું હતું કે, ‘એનસીપીના ખુલના વિભાગના વડા અને પાર્ટીના કાર્યકર મોરચાના કેન્દ્રીય સંયોજક મોહમ્મદ મોતાલેબ સિકદરને થોડીવાર પહેલા ગોળી મારી દેવામાં આવી હતી.’ મીતુ વ્યવસાયે ડોક્ટર છે. તેમણે કહ્યું કે સિકદરને ગંભીર હાલતમાં ખુલના મેડિકલ કોલેજ હોસ્પિટલમાં લઈ જવામાં આવ્યો હતો.
