યુરોપ હાલમાં અભૂતપૂર્વ અને જીવલેણ ગરમીના મોજાની પકડમાં છે, જેણે સમગ્ર ખંડને ભઠ્ઠીની જેમ ગરમ કરી દીધો છે. સ્થિતિ એટલી ખરાબ થઈ ગઈ છે કે ઘણા દેશોમાંથી રસ્તાઓ અને ટ્રાફિક લાઈટો પીગળવાના વીડિયો સામે આવી રહ્યા છે. આ રેકોર્ડબ્રેક ગરમીએ ઈન્ફ્રાસ્ટ્રક્ચર, હોસ્પિટલો, ટ્રાન્સપોર્ટેશન નેટવર્ક અને પાવર ગ્રીડને સંપૂર્ણપણે ઘૂંટણિયે લાવી દીધા છે, કારણ કે યુરોપીયન દેશોમાં ઈન્ફ્રાસ્ટ્રક્ચર ક્યારેય આવી ભારે ગરમીને સહન કરવા માટે બનાવવામાં આવ્યું ન હતું અને ત્યાં એર કન્ડીશનીંગ (AC) પણ બહુ સામાન્ય નથી.
જર્મનીમાં હાઇવે તૂટી પડવા લાગ્યા, પરિવહન બંધ થઈ ગયું
જર્મનીમાં ગરમીની સૌથી ખરાબ અસર તેના ટ્રાન્સપોર્ટ નેટવર્ક પર પડી છે.
બર્લિનને જર્મનીના પશ્ચિમ ભાગ સાથે જોડતા A2 મોટરવેનો મોટો ભાગ ગરમીને કારણે તૂટી ગયો હતો. પોલીસ પ્રવક્તાના જણાવ્યા અનુસાર હાઈવે સતત તૂટવાને કારણે એક પછી એક ઈન્ટરચેન્જ બંધ કરવા પડે છે. પૂર્વી રાજ્ય બ્રાન્ડેનબર્ગના ગેઈસર વિસ્તારમાં હાઈવેની હાલત એટલી ખરાબ થઈ ગઈ છે કે ત્યાં વાહનો ચલાવવા માટે હવે સલામત નથી.
ટ્રામના પૈડાં બંધ થઈ ગયા: લીપઝિગ શહેરમાં અત્યંત ઊંચા તાપમાનને કારણે ડામર અને બિટ્યુમેનની સપાટીઓ ઓગળવા લાગી, જેના કારણે ટ્રામ સેવા સંપૂર્ણપણે બંધ કરવી પડી.
