ઓસ્ટ્રેલિયા અને ઈંગ્લેન્ડ વચ્ચે એશિઝની બીજી ટેસ્ટ બ્રિસ્બેનમાં રમાઈ રહી છે. આ મેચમાં જો રૂટે પોતાના ટેસ્ટ કરિયરની 40મી સદી ફટકારી છે. ઓસ્ટ્રેલિયાની ધરતી પર રૂટે આ પ્રથમ વખત ટેસ્ટ સદી ફટકારી છે. જો રૂટ હવે ગાબાના ઐતિહાસિક મેદાન પર ટેસ્ટ સદી ફટકારનાર ઈંગ્લેન્ડનો આઠમો ક્રિકેટર બની ગયો છે. તેના પહેલા એન્ડ્ર્યુ સ્ટ્રોસ અને ઈયાન બોથમ સહિત 7 ક્રિકેટરો આ કરી ચુક્યા છે.
13 વર્ષમાં પહેલીવાર આવું કર્યું
જો રૂટે 2012માં ભારત વિરૂદ્ધ ટેસ્ટ ડેબ્યુ કર્યું હતું.અત્યાર સુધી રૂટે 7 અલગ-અલગ દેશોમાં સદી ફટકારી હતી, પરંતુ તે અત્યાર સુધી ઓસ્ટ્રેલિયામાં એકપણ સદીની ઇનિંગ્સ રમી શક્યો નથી. ઓસ્ટ્રેલિયામાં જો રૂટનો અત્યાર સુધીનો સર્વોચ્ચ વ્યક્તિગત સ્કોર 89 રન હતો, પરંતુ હવે તેણે ઓસ્ટ્રેલિયાની ધરતી પર સદીનો દુષ્કાળ ખતમ કરી દીધો છે.
જો રૂટ હવે ઓસ્ટ્રેલિયામાં પોતાની પ્રથમ ટેસ્ટ સદી ફટકારવા માટે સૌથી વધુ ઇનિંગ્સ રમનાર ખેલાડીઓમાંથી એક બની ગયો છે. રૂટને 30 ઇનિંગ્સની રાહ જોયા બાદ ઓસ્ટ્રેલિયામાં સદી ફટકારવાનો આનંદ મળ્યો. તેના પહેલા ઇયાન હીલી (41 ઇનિંગ્સ), બોબ સિમ્પસન (36 ઇનિંગ્સ), ગોર્ડન ગ્રીનિજ (32 ઇનિંગ્સ) અને સ્ટીવ વોને પણ ઓસ્ટ્રેલિયામાં પોતાની પ્રથમ સદી ફટકારવા માટે 32 ઇનિંગ્સ સુધી રાહ જોવી પડી હતી.
બીજી એશિઝ ટેસ્ટની સ્થિતિ
બીજી એશિઝ ટેસ્ટ બ્રિસ્બેનના ગાબા મેદાન પર રમાઈ રહી છે. આ મેચમાં ઈંગ્લેન્ડે ટોસ જીતીને પ્રથમ બેટિંગ કરવાનું પસંદ કર્યું હતું. આ લેખ લખાય છે ત્યાં સુધી ઈંગ્લેન્ડે 272 રન બનાવ્યા છે. જો રૂટે તેની કારકિર્દીની 40મી ટેસ્ટ સદી ફટકારી હતી. ટેસ્ટ ક્રિકેટ ઈતિહાસમાં સૌથી વધુ સદી ફટકારવાના મામલે રૂટ હાલમાં ચોથા સ્થાને છે. સૌથી વધુ સદીઓની યાદીમાં સચિન તેંડુલકર (51), જેક કાલિસ (45) અને રિકી પોન્ટિંગ (41) તેનાથી આગળ છે.
