અમદાવાદમાં કુલ ૧૦.૬૦ કિલોમીટર લંબાઈમાં જુદા જુદા પ્રિસિંક્ટ ડેવલોપમેન્ટનું આયોજન
(પ્રતિનિધિ)અમદાવાદ, અમદાવાદ શહેરમાં આધુનિક અને સુવ્યવસ્થિત શહેરી ઈન્ફ્રાસ્ટ્રક્ચરના વિકાસને ગતિ આપવા માટે અમદાવાદ મ્યુનિસિપલ કોર્પોરેશન દ્વારા પ્રિસિંક્ટ ડેવલોપમેન્ટ, આઈકોનિક રોડ, મોડલ રોડ તથા ઈસ્ટ-વેસ્ટ કોરિડોર જેવા વિવિધ મહત્વાકાંક્ષી પ્રોજેક્ટ હાથ ધરવામાં આવ્યા છે. શહેરના વિવિધ વિસ્તારોમાં માર્ગો તેમજ જાહેર વિસ્તારોને આધુનિક સુવિધાઓ સાથે વિકસાવવા માટે કરોડો રૂપિયાનું આયોજન કરવામાં આવ્યું છે.
અમદાવાદ શહેરમાં કુલ ૧૦.૬૦ કિલોમીટર લંબાઈમાં જુદા જુદા પ્રિસિંક્ટ ડેવલોપમેન્ટનું આયોજન કરવામાં આવ્યું છે. જેમાં થલતેજ ચાર રસ્તાથી હેલ્મેટ સર્કલ અને ત્યાંથી વિજય ચાર રસ્તા સુધી ૩.૪૦ કિલોમીટર લાંબો મેટ્રો રૂટ પ્રિસિંક્ટ, ચીમનભાઈ ફ્લાયઓવર એઈસી ક્રોસ રોડથી મોટેરા ક્રોસ રોડ, ત્યાંથી નરેન્દ્ર મોદી સ્ટેડિયમ અને વિશ્વકર્મા મેટ્રો સ્ટેશન સુધી ૪.૨૦ કિલોમીટર લાંબો સ્પોટ્ર્સ થીમ પ્રિસિંક્ટ, વિજય ચાર રસ્તાથી જુની પાસપોર્ટ ઓફિસ
અને સેપ્ટ ચાર રસ્તાથી કોમર્સ છ રસ્તા સુધી ૧.૭૦ કિલોમીટરનો એજ્યુકેશનલ નોલેજ સોસાયટી પ્રિસિંક્ટ તેમજ આશ્રમ રોડથી પશ્ચિમ રિવરફ્રન્ટને જોડતા વિવિધ એન્ટ્રી પોઈન્ટ સુધી ૧.૩૦ કિલોમીટરનો કનેક્ટિવિટી કોરિડોર સામેલ છે.
રિવરફ્ર્ન્ટ એન્ટ્રી પોઈન્ટમાં નવા વાડજ, ઉસ્માનપુરા, ઉસ્માનપુરા ગાર્ડન, બાટા જંક્શન, વલ્લભસદન, એલીસબ્રિજનો સમાવેશ થાય છે. આ તમામ કામો માટે રૂ.૩૩૪.૩૮ કરોડનું ટેન્ડર મંજૂર કરવામાં આવ્યું છે અને કામગીરી હાલ પ્રગતિમાં છે.
આ પ્રિસિંક્ટ ડેવલોપમેન્ટ અંતર્ગત મુખ્ય કેરેજ વે, રાહદારીઓ માટે વિશાળ ફૂટપાથ, સાયકલ ટ્રેક, ડ્રોપ-ઓફ અને પીક-અપ ઝોન, ઓટો રિક્ષા સ્ટેન્ડ, શેર્ડ સ્પેસમાં બેસવાની સુવિધા, મલ્ટી યુટિલિટી ઝોન, આધુનિક સાઈનેજ, લેન્ડસ્કેપિંગ, વૃક્ષારોપણ, સ્પોટ્ર્સ સ્કલ્પચર્સ, બાળકો માટે પ્લે એરિયા, થીમ આધારિત સીટિંગ વ્યવસ્થા અને શહેરની રમતગમત સિદ્ધિઓ દર્શાવતી આર્ટ ઇન્સ્ટોલેશન તેમજ પેનલ્સ જેવી સુવિધાઓ ઉભી કરવામાં આવશે.
આ ઉપરાંત શહેરમાં કુલ ૬.૬૦ કિલોમીટર લંબાઈમાં લો ગાર્ડન પ્રિસિંક્ટ ડેવલોપમેન્ટનું કામ પણ પ્રગતિ હેઠળ છે. રૂ.૯૯.૯૦ કરોડના આ પ્રોજેક્ટમાં એનસીસી ચોકથી સુભદ્રાપુર જંકશન રોડ, માઉન્ટ કારમેલ હાઈસ્કૂલથી જલારામ અન્ડરપાસ રોડ, જીઆઈસીઈએથી પંચવટી સર્કલ રોડ, મીઠાખળી ક્રોસ રોડથી વાઘબકરી ટી લાઉન્જ, માઉન્ટ કારમેલ હાઈસ્કૂલથી કોમર્સ છ રસ્તા તેમજ શ્રીવીરચંદ રાઘવજી ગાંધી ચોકથી મીઠાખળી સર્કલ રોડનો સમાવેશ થાય છે.
આ પ્રોજેક્ટ હેઠળ સુવ્યવસ્થિત ર્પાકિંગ, પ્લાન્ટેશનયુક્ત વોક-વે, આધુનિક ફૂટપાથ, વેન્ડિંગ ઝોન, બેસવા માટે બેન્ચ, ટ્રાફિક સાઈનેજ, થર્મોપ્લાસ્ટિક પેઈન્ટથી રોડ ર્માકિંગ, ઈન્ટિગ્રેટેડ લેન્ડસ્કેપ લાઈટિંગ અને નવા લાઈટ પોલ જેવી સુવિધાઓ વિકસાવવામાં આવી રહી છે. અમદાવાદ શહેરમાં આઈકોનિક રોડ પ્રોજેક્ટ અંતર્ગત પણ વિશાળ કામગીરી હાથ ધરાઈ છે.
પકવાન જંકશનથી ઈસ્કોન જંકશન રોડ, નરોડા મુકિતધામથી દેહગામ જંકશન રોડ, વિસત સર્કલથી તપોવન સર્કલ રોડ, પાલડીથી વાડજ સર્કલ સુધીનો આશ્રમ રોડ તેમજ વિસત સર્કલથી ઝુંડાલ સર્કલ રોડ અને કેનયુગ ક્રોસ રોડથી શ્યામલ ક્રોસ રોડ થઈ એસ.જી. હાઈવે સુધીના કુલ અંદાજે ૧૮ કિલોમીટર લાંબા ૬ માર્ગોનું કામ હાલ પ્રગતિ હેઠળ છે.
