પીઢ ભારતીય ગાયિકા આશા ભોંસલે પર કન્ટેન્ટ ચલાવવા બદલ પાકિસ્તાનની એક ચેનલને કાર્યવાહીનો સામનો કરવો પડ્યો છે. પાકિસ્તાનમાં રેગ્યુલેટર દ્વારા જારી કરાયેલા પત્રમાં કહેવામાં આવ્યું છે કે ભારતીય સામગ્રીના પ્રસારણ પર પ્રતિબંધ છે. આ મામલે ચેનલ પાસેથી જવાબ પણ માંગવામાં આવ્યો છે. ભોસલેનું રવિવારે મુંબઈની હોસ્પિટલમાં અવસાન થયું હતું. સોમવારે તેમના અંતિમ સંસ્કાર કરવામાં આવ્યા હતા.
પાકિસ્તાન ઈલેક્ટ્રોનિક મીડિયા રેગ્યુલેટરી ઓથોરિટી (PEMRA) એ ભોસલેના મૃત્યુના સમાચાર સાથે ભારતીય કન્ટેન્ટ શા માટે પ્રસારિત કર્યું તે અંગે ખુલાસો માંગતી જિયો ન્યૂઝને કારણ બતાવો નોટિસ જારી કરી છે. પાકિસ્તાનમાં ભારતીય કન્ટેન્ટ પર પ્રતિબંધ 2018થી અમલમાં છે.
સુપ્રીમ કોર્ટનો સંદર્ભ
PEMRAએ કહ્યું કે ભોસલેના મૃત્યુના સમાચાર પ્રસારિત કરતી વખતે જિયો ન્યૂઝ દ્વારા ભારતીય ગીતો અને ભારતીય ફિલ્મોના દ્રશ્યોનું પ્રસારણ કરવું એ પાકિસ્તાનની સુપ્રીમ કોર્ટના નિર્ણયનું જાણી જોઈને ઉલ્લંઘન છે. જેમાં ભારતીય સામગ્રીના પ્રસારણ પર પ્રતિબંધ મુકવામાં આવ્યો છે.
ચેનલે શું કહ્યું
જિયોન્યૂઝના મેનેજિંગ ડાયરેક્ટર અઝહર અબ્બાસે એક પોસ્ટમાં જણાવ્યું હતું કે, ‘પ્રખ્યાત કલાકારોના કામને યાદ રાખવાની અને તેમના વિશે રિપોર્ટ કરતી વખતે તેમની પ્રશંસા કરવાની હંમેશા પરંપરા રહી છે. વાસ્તવમાં, આશા ભોંસલે જેવી કલાકાર માટે, આપણે તેના વધુ કાલાતીત અને યાદગાર ગીતો શેર કરવા જોઈએ. તેમ છતાં, પાકિસ્તાનના ઇલેક્ટ્રોનિક મીડિયા રેગ્યુલેટર, PEMRAએ તેના પર પ્રતિબંધ મૂકવાનું પસંદ કર્યું છે.’
