અમેરિકા સાથે ટ્રેડ ડીલ બાદ હવે એક જ સવાલ ચર્ચાઈ રહ્યો છે કે શું ભારત રશિયા પાસેથી ઓઈલ ખરીદવાનું ચાલુ રાખશે કે નહીં? અત્યાર સુધી આ મુદ્દે ભારત તરફથી કોઈ સત્તાવાર પ્રતિક્રિયા આવી નથી, પરંતુ રશિયાએ હવે સ્પષ્ટપણે પોતાનું વલણ જાહેર કર્યું છે. હકીકતમાં, ભારત અને અમેરિકા વચ્ચે નવા વેપાર કરારની જાહેરાતના બે દિવસ પછી, યુએસ પ્રમુખ ડોનાલ્ડ ટ્રમ્પે દાવો કર્યો હતો કે નવી દિલ્હી રશિયન તેલની ખરીદી બંધ કરશે. પરંતુ હવે રશિયાએ આ અંગે પ્રતિક્રિયા આપી છે અને કહ્યું છે કે ભારત કોઈપણ દેશ પાસેથી તેલ ખરીદવા માટે સંપૂર્ણપણે સ્વતંત્ર છે.
રશિયાના રાષ્ટ્રપતિના પ્રેસ સેક્રેટરી દિમિત્રી પેસ્કોવે જણાવ્યું હતું કે રશિયા ભારતને તેલ અને પેટ્રોલિયમ ઉત્પાદનોનો સપ્લાય કરતો એકમાત્ર દેશ નથી. ભારત હંમેશા અન્ય દેશોમાંથી પણ આ ઉત્પાદનો ખરીદતું રહ્યું છે. તેથી, આમાં કંઈ નવું નથી. પીટીઆઈ અનુસાર, પેસ્કોવે વધુમાં કહ્યું કે અમે અને અન્ય તમામ આંતરરાષ્ટ્રીય ઉર્જા નિષ્ણાતો સારી રીતે જાણીએ છીએ કે ભારતને માત્ર રશિયા જ ઓઈલ સપ્લાયર નથી. ભારત અન્ય દેશો પાસેથી પણ તેલ ખરીદી રહ્યું છે. તેથી, અમને આમાં કંઈ નવું દેખાતું નથી.
ક્રેમલિનના પ્રવક્તાની આ ટિપ્પણી ટ્રમ્પના દાવા પર આવી છે જેમાં તેમણે કહ્યું હતું કે વડા પ્રધાન નરેન્દ્ર મોદી રશિયન તેલની ખરીદી બંધ કરવા અને અમેરિકા પાસેથી તેલ ખરીદવા માટે રાજી થઈ ગયા છે. મંગળવારે પેસ્કોવે કહ્યું કે રશિયાને આ મુદ્દે નવી દિલ્હી તરફથી કોઈ માહિતી મળી નથી. તેમણે એમ પણ ઉમેર્યું હતું કે રશિયા ભારત સાથેના તેના સંબંધોને ખૂબ મહત્વ આપે છે અને તેમની વ્યૂહાત્મક ભાગીદારીને આગળ વધારવાનું ચાલુ રાખશે.
અમેરિકી રાષ્ટ્રપતિ ટ્રમ્પે શું કહ્યું?
તમને જણાવી દઈએ કે અમેરિકી રાષ્ટ્રપતિ ડોનાલ્ડ ટ્રમ્પે સોમવારે વોશિંગ્ટન અને નવી દિલ્હી વચ્ચે નવા વેપાર કરારની જાહેરાત કરી હતી. આમાં ભારત માટે પારસ્પરિક ટેરિફમાં ઘટાડો શામેલ છે અને ટ્રમ્પે દાવો કર્યો હતો કે નવી દિલ્હી રશિયન તેલ ખરીદવાનું બંધ કરશે અને અમેરિકન ઉત્પાદનોની આયાત વધારશે. ભારતે ટેરિફમાં ઘટાડો કરવાની પુષ્ટિ કરી છે, પરંતુ રશિયન તેલની આયાત રોકવા અંગે કોઈ સત્તાવાર નિવેદન આવ્યું નથી.
ઉલ્લેખનીય છે કે ટ્રમ્પ અને વડાપ્રધાન મોદીએ સોમવારે ફોન પર વાતચીત બાદ આ કરારની જાહેરાત કરી હતી. પીએમ મોદીએ કહ્યું કે ટ્રમ્પ સાથે વાતચીત બાદ હવે ભારતીય સામાન પર અમેરિકાનો ટેરિફ ઘટાડીને 18% કરવામાં આવશે. અગાઉ ભારતે 25%નો પારસ્પરિક ટેરિફ અને 25% વધારાનો દંડ ચૂકવવો પડતો હતો. પીએમ મોદીએ સોશિયલ મીડિયા પર એક પોસ્ટમાં લખ્યું હતું કે આજે તેમના પ્રિય મિત્ર રાષ્ટ્રપતિ ટ્રમ્પ સાથે વાત કરીને ખૂબ જ આનંદ થયો. મને એ જાણીને આનંદ થયો કે હવે ‘મેડ ઈન ઈન્ડિયા’ ઉત્પાદનો પર ટેરિફ ઘટાડીને 18% કરવામાં આવશે. ભારતના લોકો વતી, આ અદ્ભુત જાહેરાત માટે રાષ્ટ્રપતિ ટ્રમ્પનો ખૂબ ખૂબ આભાર. જો કે પીએમ મોદીની પોસ્ટમાં ટેરિફ ઘટાડવાનો ઉલ્લેખ કરવામાં આવ્યો છે, પરંતુ રશિયન તેલની ખરીદી સંબંધિત કોઈ પ્રતિબદ્ધતા અથવા કરારનો ઉલ્લેખ નથી.
