(એજન્સી)અમદાવાદ, અમદાવાદના વાડજ પોલીસ સ્ટેશનમાં નોંધાયેલા પોસ્કોના ગુનામાં ધરપકડ કરાયેલો આરોપી પોલીસને ચકમો આપીને નાસી છૂટ્યો છે. વાડજ પોલીસે પોસ્કોના ગુનામાં સંડોવાયેલા ‘ભરત’ નામના આરોપીની ગત રાત્રે આશરે ૧૧ઃ૩૦ વાગ્યે ધરપકડ કરી હતી. આરોપી ભાગ્યો ત્યારે તેની સાથે બે જ પોલીસકર્મીઓ હોવાની જાણકારી મળી રહી છે જેમને ચકમો આપી આરોપી નાસી છૂટ્યો હતો.
ધરપકડ કર્યા બાદ નિયમ મુજબ આરોપીને મેડિકલ તપાસ માટે લઈ જવામાં આવ્યો હતો. વહેલી સવારે આશરે ૫ઃ૦૦ વાગ્યાની આસપાસ જ્યારે પોલીસ ટીમ આરોપીને મેડિકલ કરાવીને પરત લાવી હતી, ત્યારે પોલીસ સ્ટેશનની બહાર ગાડીમાંથી ઉતારતી વખતે આ ઘટના બની હતી. ગાડીમાંથી ઉતારતી વખતે તક મળતાં જ આરોપી ભરત પોલીસની સમયસૂચકતા અને પકડમાંથી છૂટીને અંધારાનો લાભ લઈ નાસી છૂટ્યો હતો.
પોસ્કો જેવા ગંભીર ગુનાનો આરોપી પોલીસ સ્ટેશનના ઉંબરેથી જ ફરાર થઈ જતાં પોલીસની કામગીરી સામે સવાલો ઊભા થયા છે. હાલમાં વાડજ પોલીસે ફરાર આરોપીને ઝડપી પાડવા માટે અલગ-અલગ ટીમો બનાવી ચક્રો ગતિમાન કર્યા છે અને શહેરભરમાં શોધવા માટે આદેશો આપવામાં આવ્યા છે.
આ અંગે વાડજ પોલીસ સ્ટેશનના પીઆઈ એચ. પી. ગરાસિયાએ જણાવ્યું કે, અમે ગઈકાલે ભરતભાઈ સુરેશભાઈ ડાભાણી નામના એક આરોપી સામે પોક્સો હેઠળ ગુનો નોંધ્યો હતો અને તેનું રાત્રે મેડિકલ કરાવ્યું હતું.
સવારે જ્યારે અમારા બે પોલીસ કર્મીઓ તેને અસારવા સિવિલ હાસ્પિટલ ખાતેથી પોલીસ સ્ટેશને લાવી ગાડીમાંથી ઉતારી રહ્યા હતા, ત્યારે તે ભાગી ગયો છે. ત્યારબાદ અમને તેનું એક લોકેશન મળ્યું હતું, જ્યાં અમે તેને શોધવા તપાસ કરવા ગયા હતા.
