ભારતના સ્ટાર બેટ્સમેન તિલક વર્મા ન્યુઝીલેન્ડ સામેની આગામી T20 શ્રેણીની પ્રથમ ત્રણ મેચમાંથી બહાર થઈ ગયા છે. ભારતીય બેટ્સમેન તિલક વર્માએ મંગળવારે રાજકોટમાં બંગાળ સામેની વિજય હજારે ટ્રોફી મેચ બાદ દુખાવાની ફરિયાદ બાદ પેટના નીચેના ભાગમાં સર્જરી કરાવી છે. જેના કારણે તે પ્રારંભિક મેચ રમી શકશે નહીં. છેલ્લી બે મેચોમાં તિલકની ઉપલબ્ધતા તેની રિકવરી અને ટ્રેનિંગની પ્રગતિ પર નિર્ભર રહેશે.
અસહ્ય દુખાવાની ફરિયાદ બાદ તિલકને રાજકોટની હોસ્પિટલમાં લઈ જવામાં આવ્યા હતા. તે વિજય હજારે ટ્રોફી ODI ચેમ્પિયનશિપ માટે હૈદરાબાદની ટીમ સાથે રાજકોટમાં છે. ભારતીય ક્રિકેટ કંટ્રોલ બોર્ડ (BCCI)ના અધિકારીએ પીટીઆઈને જણાવ્યું હતું કે, “વિજય હજારે ટુર્નામેન્ટ માટે હૈદરાબાદની ટીમ સાથે રાજકોટમાં રમી રહેલા તિલક વર્માએ તેમના અંડકોષમાં તીવ્ર દુખાવાની ફરિયાદ કરી હતી.” તેને તરત જ ગોકુલ હોસ્પિટલમાં લઈ જવામાં આવ્યો, જ્યાં સ્કેનિંગમાં ટેસ્ટિક્યુલર ટોર્સિયન (અચાનક તીવ્ર દુખાવો) જોવા મળ્યો અને તાત્કાલિક શસ્ત્રક્રિયાની સલાહ આપવામાં આવી.”
તેણે કહ્યું, “અમે અમારા નિષ્ણાતોની સલાહ લીધી હતી અને તેઓ પણ આ સાથે સંમત થયા હતા. તિલકની સર્જરી સફળ રહી હતી અને તે હવે ઠીક છે. મેડિકલ પેનલ સાથે ચર્ચા કર્યા પછી તેમના સ્વાસ્થ્યમાં સુધારો અને રમતમાં પાછા ફરવાના સંભવિત સમય વિશે અમને માહિતી મળશે કે તરત જ અમે તમને જાણ કરીશું.
ડિસેમ્બરમાં દક્ષિણ આફ્રિકા સામે T20 શ્રેણી રમ્યા બાદ, તિલક વિજય હજારે ટ્રોફીની બે મેચોમાં હૈદરાબાદનું નેતૃત્વ કર્યું હતું. 3 જાન્યુઆરીએ તેણે ચંદીગઢ સામે 109 રનની ઇનિંગ પણ રમી હતી અને આ સિવાય મંગળવારે બંગાળ સામે તેણે 34 રન બનાવ્યા હતા. તિલક વર્મા છેલ્લા એક વર્ષમાં ભારતીય T20 ટીમના મુખ્ય સભ્ય છે. એશિયા કપ 2025ની ફાઇનલમાં તેની મેચ વિનિંગ ઇનિંગ્સના કારણે તેને ‘આઇસમેન’નો ખિતાબ મળ્યો. 40 T20 આંતરરાષ્ટ્રીય મેચોમાં તેણે 49.29ની સરેરાશ અને 144.09ની સ્ટ્રાઈક રેટથી 1183 રન બનાવ્યા છે, જેમાં 2 સદી અને 6 અડધી સદી સામેલ છે.
ન્યુઝીલેન્ડ સામે ટી20 સીરીઝ 21 જાન્યુઆરીથી નાગપુરમાં શરૂ થશે, ત્યારબાદ રાયપુર, ગુવાહાટી, વિશાખાપટ્ટનમ અને તિરુવનંતપુરમમાં મેચ રમાશે. આ શ્રેણી ફેબ્રુઆરીમાં ભારત-શ્રીલંકામાં યોજાનાર T20 વર્લ્ડ કપની અંતિમ તૈયારી છે. તિલકની ગેરહાજરીમાં ટીમ મેનેજમેન્ટને મિડલ ઓર્ડરમાં ફેરફાર કરવા પડી શકે છે. તેની પ્રથમ મેચ ભારત અને અમેરિકા વચ્ચે મુંબઈમાં રમાશે. ભારત તેની બીજી મેચ 12 ફેબ્રુઆરીએ દિલ્હીમાં નામીબિયા સામે રમશે.
