વડાપ્રધાન નરેન્દ્ર મોદીના નોર્વે પ્રવાસ દરમિયાન પ્રેસની સ્વતંત્રતા અને માનવાધિકારને લઈને મોટો વિવાદ જોવા મળ્યો હતો. ઓસ્લોમાં નોર્વેના પત્રકાર હેલે લિંગ અને ભારતીય વિદેશ મંત્રાલયના સચિવ (પશ્ચિમ) સિબી જ્યોર્જ વચ્ચે ઉગ્ર દલીલો થઈ હતી. વિવાદ ત્યારે શરૂ થયો જ્યારે પત્રકારે પીએમ મોદીને સીધા પ્રશ્નો પૂછવાનો પ્રયાસ કર્યો અને બાદમાં પ્રેસ કોન્ફરન્સમાં ભારતીય અધિકારીઓ પર સવાલોનો બોમ્બ ફેંક્યો.
વિવાદ શરૂ થયો: “શા માટે વિશ્વના સૌથી મુક્ત પ્રેસના પ્રશ્નો નથી લેવાતા?”
આ સમગ્ર ઘટના ત્યારે શરૂ થઈ જ્યારે વડાપ્રધાન મોદી અને નોર્વેના વડાપ્રધાન જોનાસ ગહર સ્ટોરી ઓસ્લોમાં સંયુક્ત પ્રેસ સ્ટેટમેન્ટ આપી રહ્યા હતા. બંને નેતાઓના સંબોધન પૂરા થયા પછી, પીએમ મોદીએ વિદાય લેવાનું શરૂ કર્યું, નોર્વેના ઓસ્લો સ્થિત ડેગ્સવિસેન અખબારના પત્રકાર હેલી લિંગે બૂમ પાડી, “વડાપ્રધાન મોદી, તમે વિશ્વના સૌથી સ્વતંત્ર પ્રેસના કેટલાક પ્રશ્નો કેમ નથી લેતા?”
પીએમ મોદીએ આ સવાલનો કોઈ જવાબ ન આપ્યો અને ત્યાંથી ચાલ્યા ગયા. આ પછી હેલી લિંગે સોશિયલ મીડિયા પ્લેટફોર્મ ‘X’ પર એક વીડિયો શેર કર્યો અને લખ્યું કે તેને PM મોદી પાસેથી જવાબની આશા પણ નહોતી. તેમણે ઉલ્લેખ કર્યો કે ‘વર્લ્ડ પ્રેસ ફ્રીડમ ઈન્ડેક્સ’માં નોર્વે પ્રથમ ક્રમે છે, જ્યારે ભારત 157માં સ્થાને ઘણું નીચે છે.
MEAની પ્રેસ કોન્ફરન્સમાં જોરદાર ચર્ચા થઈ
આ ઘટના બાદ સાંજે વિદેશ મંત્રાલય (MEA) દ્વારા એક પ્રેસ બ્રીફિંગ યોજવામાં આવી હતી. હેલી લિંગ પણ આ પ્રેસ કોન્ફરન્સમાં પહોંચી અને સતત તીક્ષ્ણ પ્રશ્નો પૂછીને ભારતીય રાજદ્વારીઓને ઘેરવાનો પ્રયાસ કર્યો. અહીં જ વિદેશ મંત્રાલયના સચિવ સિબી જ્યોર્જ સાથે તેમનો સીધો અને તણાવપૂર્ણ મુકાબલો થયો હતો.
