લીમખેડાની ધાનપુર ચોકડી પાસે કારમાંથી રૂ.૨.૫૬ કરોડથી વધુની બિનહિસાબી રોકડ ઝડપાઈ
(તસ્વીરઃ મનોજ મારવાડી, ગોધરા) દાહોદ જિલ્લાના લીમખેડા તાલુકામાં પોલીસે રૂટીન વાહન ચેકિંગ દરમિયાન મોટી કાર્યવાહી હાથ ધરી કરોડો રૂપિયાની બિનહિસાબી રોકડ રકમ ઝડપી પાડી છે.
લીમખેડાની ધાનપુર ચોકડી પાસે પોલીસ દ્વારા હાથ ધરાયેલા વાહન ચેકિંગ દરમિયાન એક અર્ટિગા કાર શંકાસ્પદ હાલતમાં રોકવામાં આવી હતી. કારની તલાશી લેતા અંદરથી ત્રણ પાર્સલ મળી આવ્યા હતા, જેને લઈને પોલીસને શંકા જતાં પંચોની હાજરીમાં પાર્સલો ખોલી તપાસ હાથ ધરવામાં આવી હતી.
પોલીસ તપાસ દરમિયાન પાર્સલમાંથી ભારતીય ચલણી નોટોનો મોટો જથ્થો મળી આવ્યો હતો. લાંબી ગણતરી બાદ કુલ રૂપિયા ૨,૫૬,૮૦,૫૦૦ જેટલી માતબર રોકડ રકમ બહાર આવી હતી. આટલી મોટી રકમ મળતાં પોલીસ તંત્રમાં પણ દોડધામ મચી જવા પામી હતી.
પ્રાથમિક પૂછપરછ દરમિયાન કાર ચાલક તરીકે રહેલા રાજુભાઈ નીનામાએ જણાવ્યું હતું કે દાહોદની એક આંગડિયા પેઢીમાંથી આ રોકડ રકમ વડોદરા પહોંચાડવા માટે લઈ જવાઈ રહી હતી.
વધુમાં તેણે દાહોદના ભરત ચોપડા નામના વ્યક્તિએ આ રકમ વડોદરા પહોંચાડવા માટે સોંપી હોવાની કબૂલાત પણ આપી હોવાનું જાણવા મળ્યું છે. જોકે, પોલીસ દ્વારા માંગવામાં આવતા આટલી મોટી રકમ અંગે કોઈપણ પ્રકારના કાયદેસર દસ્તાવેજો, હિસાબી પુરાવા અથવા ટ્રાન્ઝેક્શન સંબંધિત માહિતી રજૂ કરવામાં આવી નહોતી.
પરિણામે લીમખેડા પોલીસે સમગ્ર રકમ કબ્જે કરી મ્દ્ગજીજીની સંબંધિત કલમ હેઠળ સીઝરની કાર્યવાહી હાથ ધરી હતી. બાદમાં રોકડ રકમને સરકારી ટ્રેઝરીમાં જમા કરાવવામાં આવી હોવાનું પોલીસ સૂત્રોએ જણાવ્યું હતું. સાથે જ સમગ્ર મામલે સ્ટેશન ડાયરી એન્ટ્રી નોંધવામાં આવી છે અને વધુ તપાસ માટે ઇન્કમટેક્સ વિભાગને સત્તાવાર જાણ કરવામાં આવી છે.
આ ઘટનાએ દાહોદ જિલ્લામાં ભારે ચર્ચા જગાવી છે. પોલીસે હવે આ રકમનો સ્ત્રોત, તેનો હેતુ અને તેમાં અન્ય કોઈ વ્યક્તિઓ સંડોવાયેલા છે કે નહીં તે દિશામાં વધુ તપાસ શરૂ કરી છે.
