ડીંડોલી વોર્ડ યુવા મોરચાના ઉપપ્રમુખ તરીકે પક્ષની જવાબદારી સંભાળતો હતો જય-આ ઘટનાના સીસીટીવી ફૂટેજ પણ સામે આવ્યા-જય દલાલ MLA સંગીતા પાટીલના નજીકના ગણાતા જયશ્રી દલાલનો પુત્ર
(એજન્સી)સુરત, શહેરમાં ભાજપના યુવા નેતાની જાહેરમાં હત્યા કરવામાં આવી છે. ડીંડોલી યુવા મોરચાના ઉપપ્રમુખ જય દલાલની ઉધના વિસ્તારમાં હત્યા થતા ચકચાર મચી જવા પામી છે.
નોંધનીય છે કે, જય દલાલ એમએલએ સંગીતા પાટીલના નજીકના ગણાતા જયશ્રી દલાલનો પુત્ર છે. યુવકની હત્યાને લઈને પોલીસે તપાસ શરૂ કરી છે. જોકે, વ્હાલસોયા દીકરાને ગુમાવવાને કારણે પરિવારમાં આક્રોશ અને આક્રંદ જોવા મળી રહ્યો છે. જય દલાલની સુરતના ઉધના વિસ્તારમાં હત્યા કરવામાં આવી છે. આ ઘટનાના સીસીટીવી ફૂટેજ પણ સામે આવ્યા છે.
આ અંગે મૃતકની બહેને જણાવ્યું કે, આ મારો ભાઈ મારા પિતાની ગરજ સારતો હતો. તેની હત્યા કરનારાઓને બીજી કોઈ નહીં પરંતુ ફાંસીની સજા મળે તેવી જ મારી સરકારને અપીલ છે.
જયના માતાએ જણાવ્યું કે, મારો દીકરો ઘરેથી સાંજે સાડા સાત વાગે નીકળ્યો હતો. તેણે મને કહ્યું હતું કે, હું બહારથી જમીને આવીશ. તે પછી મને સાડા બારની આસપાસ ફોન આવ્યો કે, તેને મિલિન્દ ચકલી અને પંકજ પાટિલ સાથે અન્ય છોકરાઓએ તેને બહુ બધા ઘા મારી દીધા હતા. તેથી તેને હોસ્પિટલમાં લઈ જવામાં આવ્યો છે. આ ફોન આવતા હું અહીં આવી અને જોયું તો મારા દીકરાએ આંખ જ ના ખોલી. મને ન્યાય જોઈએ. મારો એકનો એક છોકરો હતો.
મૃતક જય દલાલ સુરતના લીંબાયત વિસ્તારના ધારાસભ્ય સંગીતાબેન પાટીલની અત્યંત નજીક ગણાતા મહિલા અગ્રણી જયશ્રીબેન દલાલનો પુત્ર હતો. આ ઉપરાંત તે પોતે પણ ભાજપ સંગઠન સાથે સક્રિયપણે જોડાયેલો હોવાનું સામે આવ્યું છે. ડીંડોલી વોર્ડ યુવા મોરચાના ઉપપ્રમુખ તરીકે પક્ષની જવાબદારી સંભાળતો હતો. હાલ પોલીસે આરોપીઓને ઝડપી પાડવા માટે વધુ તપાસ હાથ ધરી છે.
