કડી તાલુકાના સેવડા ગામના વધારોડાના ગ્રામજનો તંત્રને કારણે ભારે મુશ્કેલીનો સામનો કરી રહ્યા છે. જ્યારે કડી તાલુકાના અનેક ગ્રામ્ય વિસ્તારોમાં આ વર્ષે સારો વરસાદ વરસી રહ્યો છે. વાધરોડા ગામના તળાવનું ઓવરફ્લો પાણી ગામની અંદર અને જાહેર માર્ગો પર વહેતાં લોકોને મુશ્કેલીનો સામનો કરવો પડી રહ્યો છે પરંતુ તંત્ર આંખ આડા કાન કરી રહ્યું હોય તેમ લાગી રહ્યું છે. કડીથી 20 કિલોમીટર દૂર આવેલા વાધરોડાના ગ્રામજનો પાણીમાંથી પસાર થઈ રહ્યા છે. કડી શહેર અને ગ્રામ્ય વિસ્તારોમાં આ વર્ષે 50% વધુ વરસાદ અને 15 ઈંચ વરસાદ નોંધાયો છે. છેલ્લા ચાર દિવસથી ગ્રામ્ય વિસ્તારોમાં ઝરમર ઝરમર વરસાદ પડી રહ્યો છે. કડી તાલુકાના વાધરોડા ગામે તળાવ ઓવરફ્લો થતાં તળાવનું પાણી ગામની અંદર ઘુસી જતાં અનેક ઘરોમાં પાણી ભરાઇ ગયા હતા અને જાહેર માર્ગો પર પાણી વહી જતાં લોકોમાં હાહાકાર મચી ગયો હતો. ગ્રામજનોએ તંત્રને અનેકવાર જાણ કરી હોવા છતાં તંત્ર આંખ આડા કાન કરી રહ્યું હોય તેવું લાગી રહ્યું છે. કડી તાલુકાના વાધરોડા ગામે તળાવના પાણીથી ગામના જાહેર માર્ગો તેમજ શાળાની આસપાસ ચાલતા લોકોને અસર થઈ રહી છે. ગામના બાળકો પાણીમાંથી શાળાએ જતા હોવાનું પણ જોવા મળે છે. જેના કારણે ચામડીના રોગ થવાની સંભાવના રહે છે. સ્થાનિક લોકો દ્વારા અધિકૃત ટીડીઓને અનેકવાર લેખિત રજુઆત અને ઉચ્ચ કક્ષાએ આવેદનપત્ર આપવા છતાં કોઈ નિરાકરણ ન આવતા લોકોમાં રોષ ભભૂકી ઉઠ્યો છે. ગામના સ્થાનિક આગેવાનો સાથે વાત કરતાં તેમણે જણાવ્યું હતું કે, આ સમસ્યા છેલ્લા ચાર-પાંચ વર્ષથી છે, આ બાબતે અમે અનેક વખત ઉચ્ચ કક્ષાએ રજૂઆત કરી છે. હજુ પણ કંઈ ઉકેલાતું નથી. તેમજ વરસાદ પડે ત્યારે ખેતરોમાંથી પાણી ગામના તળાવમાં વહી જાય છે અને તળાવનું પાણી ગામમાં પ્રવેશે છે. જેના કારણે ગ્રામજનોને ભારે હાલાકીનો સામનો કરવો પડી રહ્યો છે.