મોબાઈલ ફોન પર ચાલી રહેલી આઈપીએલ મેચ પર સટ્ટો રમાડતા ડીસાના એક યુવકની દક્ષિણ પોલીસે ધરપકડ કરી છે. જ્યારે પોલીસે યુવકને આઈડી આપનાર અમદાવાદના વ્યક્તિ સામે પણ ગુનો નોંધ્યો છે. ડીસા દક્ષિણ પોલીસ મથકના પીઆઈ શક્તિસિંહ ગોહિલની સુચનાથી ડીસા ડીવાયએસપી ડો.કુશલ ઓઝાના માર્ગદર્શન હેઠળ દક્ષિણ પોલીસ અમલા દારૂ જુગારના કેસની ઝુંબેશમાં રોકાયેલ હતા. ત્યારે જ પોલીસને બાતમી મળી હતી કે ડીસાણી જમનાબાઈ પ્રાથમિક શાળા પાસે આવેલ શોપીંગ સેન્ટરમાં એક યુવક મોબાઈલ ફોન પર ક્રિકેટનો સટ્ટો રમી રહ્યો છે. જેથી પોલીસે ઘટના સ્થળે પહોંચી કૃણાલ પ્રકાશભાઈ પઢિયાર (રહે. જલારામ સોસાયટી ભાગ 1, ડીસા)નો મોબાઈલ ફોન ચેક કરતાં તે ક્રિકેટનો સટ્ટો રમી રહ્યો હોવાનું જાણવા મળ્યું હતું. કૃણાલ મહેન્દ્રભાઈ દેવશીભાઈ પ્રજાપતિ (હાલ, રહે. અમદાવાદ મુળ ડીસા ગાયત્રીનગર) માસ્ટર આઈડી મેળવી મોબાઈલમાં જુગાર રમતા હતા. આથી પોલીસે કેસ નોંધીને કૃણાલને કસ્ટડીમાં લીધો હતો, જ્યારે મહેન્દ્ર પ્રજાપતિ સામે પણ ગુનો નોંધીને તેની ધરપકડ માટે ચક્રો ગતિમાન કર્યા હતા.