બનાસકાંઠા ડીસા અને પાલનપુર નગરપાલિકાની પેટાચૂંટણી માટે આવતીકાલે મતદાન પ્રક્રિયા હાથ ધરવા સ્થાનિક તંત્ર સજ્જ બન્યું છે. જેમાં ડીસાના 7 મતદાન મથકો પર મતદાનની પ્રક્રિયા હાથ ધરાશે. વોર્ડ નંબર 9ના કોર્પોરેટર સાદિક શેખના રાજીનામા બાદ ખાલી પડેલી બેઠકની પેટાચૂંટણી માટે પૂર્વ નિર્ધારિત કાર્યક્રમ મુજબ રવિવારે મતદાન યોજાશે. ડીસા નગરપાલિકા. ત્યારે આ પેટાચૂંટણીની મતદાન પ્રક્રિયા શાંતિપૂર્ણ માહોલમાં હાથ ધરવા તંત્ર સજ્જ બન્યું છે. આવતીકાલે સવારથી ચુસ્ત પોલીસ બંદોબસ્ત વચ્ચે મતદાન પ્રક્રિયા હાથ ધરવામાં આવશે. ભાજપના કાંતિલાલ લોઢા, કોંગ્રેસના ઈમરાન કુરેશી અને આમ આદમી પાર્ટીના જીજ્ઞેશ દેસાઈ વચ્ચે ચૂંટણી જંગ છે. ડીસા નગરપાલિકાના વોર્ડ નંબર 9ની પેટાચૂંટણીમાં 8232 મતદારો મતદાન પ્રક્રિયામાં ભાગ લઈ નિર્ણય લેશે. બંને બેઠકો પર યોજાનારી પેટાચૂંટણીમાં વ્યવસ્થા જાળવવા પોલીસકર્મીઓ પણ તૈનાત કરવામાં આવ્યા છે. ડીસા નગરપાલિકાની પેટા ચૂંટણી શાંતિપૂર્ણ માહોલમાં યોજાય તે માટે સ્થાનિક તંત્ર સજ્જ થઈ ગયું છે અને મતદારોને પણ નિર્ભયતાથી મતદાન કરવા અપીલ કરવામાં આવી છે.