મ્યુનિસિપલ એજન્સીને નાણાં નહીં ચૂકવવાના કારણે એજન્સીએ પણ હાર માની લીધી હતી.
નડિયાદ નગરપાલિકામાં વિવિધ વિભાગોમાં કર્મચારીઓને આઉટસોર્સર દ્વારા સપ્લાય કર્યા બાદ એજન્સીએ 3 થી 4 માસથી કર્મચારીઓનો પગાર ચૂકવ્યો નથી. નડિયાદ નગરપાલિકા એજન્સીને નાણાં આપતી નથી અને એજન્સી કર્મચારીઓને પગાર ચૂકવવા સક્ષમ નથી. દરમિયાન કર્મચારીઓની મુશ્કેલીઓ વધી છે. નગરપાલિકામાં મોટાભાગની કામગીરી આઉટસોર્સ કર્મચારીઓ દ્વારા કરવામાં આવે છે, તેમ છતાં પગાર ચૂકવવાના મામલે લાલિયાવાડીના કારણે કર્મચારીઓનું મનોબળ તૂટતું જોવા મળી રહ્યું છે.
પ્રાપ્ત વિગતો મુજબ નડિયાદ નગરપાલિકામાં મહેસાણાની રાધે એન્ટરપ્રાઈઝ નામની એજન્સી દ્વારા કોમ્પ્યુટર ઓપરેટર, ડ્રાઈવર, પત્તાવાળા સહિતના કર્મચારીઓને આઉટ સોર્સીંગ દ્વારા પુરી પાડવામાં આવે છે. એજન્સીએ કર્મચારીઓને ત્રણ મહિના એટલે કે જાન્યુઆરી, ફેબ્રુઆરી અને માર્ચનો પગાર ચૂકવ્યો નથી. આ કેસમાં એજન્સીના જણાવ્યા મુજબ નડિયાદ નગરપાલિકા પગાર પેટે કરારમાં નક્કી કરેલી રકમ ચૂકવતી નથી તેથી પગાર બાકી છે. તેમજ નડિયાદ નગરપાલિકાએ હાલમાં તેમની પાસે ફંડ ન હોવાનું જણાવ્યું છે અને મિલકતો વેચાઈ જશે ત્યારે પૈસા આપીશું તેમ અધિકારીઓ જણાવી રહ્યા છે. પરંતુ નાના કર્મચારીઓ એજન્સી અને નગરપાલિકાની આ લાપરવાહીનો ભોગ બની રહ્યા છે અને મહિનાઓથી પગાર ન મળવાને કારણે તેમનું ગુજરાન ચલાવવું મુશ્કેલ બન્યું છે. આ ઉપરાંત આર્થિક સંકટ વચ્ચે આ કર્મચારીઓનું કામકાજનું મનોબળ પણ તૂટી રહ્યું છે. ત્યારે આ અંગે યોગ્ય ઉકેલ શોધીને કર્મચારીઓને દર મહિને નિયત સમયમાં પગાર ચૂકવવામાં આવે તેવી માંગ ઉઠી છે.