પ્રકાશ સિંહ બાદલનો જન્મ 8 ડિસેમ્બર 1927ના રોજ પંજાબના ફાઝિલ્કાના અબુલ ખુરાના ગામમાં થયો હતો. તેમણે 1947 માં શિરોમણી અકાલી દળ (SAD) પાર્ટીના સભ્ય તરીકે તેમની રાજકીય કારકિર્દીની શરૂઆત કરી હતી. તેઓ 5 વખત પંજાબના મુખ્યમંત્રી પણ રહ્યા હતા. પ્રકાશ સિંહ બાદલ પહેલા 1970 થી 1971, પછી 1977 થી 1980, પછી 1997 થી 2002, 2007 થી 2012 અને 2012 થી 2017 સુધી કુલ 5 વખત પંજાબના સીએમ પદ પર રહ્યા.
પ્રકાશ સિંહ બાદલ લોકસભાના સભ્ય પણ હતા, 1977માં તેમણે વડાપ્રધાન મોરારજી દેસાઈની સરકારમાં કેન્દ્રીય કૃષિ અને સિંચાઈ મંત્રી તરીકેનો કાર્યભાર સંભાળ્યો હતો. મીડિયા રિપોર્ટ્સ અનુસાર, પ્રકાશ સિંહ બાદલે ઘણા રેકોર્ડ પોતાના નામે કર્યા. 1952માં સૌથી યુવા સરપંચ બનવાનો રેકોર્ડ તેમના નામે હતો. ત્યારબાદ 1970માં તેઓ સૌથી યુવા મુખ્યમંત્રી બન્યા.
2012માં પ્રકાશ સિંહ બાદલ સૌથી વૃદ્ધ મુખ્યમંત્રી બન્યા હતા. 2022ની પંજાબ વિધાનસભા ચૂંટણી દરમિયાન તેઓ સૌથી વૃદ્ધ ઉમેદવાર હતા. જોકે બાદલ આ ચૂંટણી હારી ગયા હતા. આ 13મી વિધાનસભા ચૂંટણી હતી.