ડીસાના નવીભીલડીમાં સોમવારે રાત્રે તસ્કરોએ જ્વેલર્સની દુકાનને નિશાન બનાવી હતી. પરંતુ મજબૂત જાળી તોડી ન શકતા નજીકમાં પડેલું કાઉન્ટર તોડી અંદરથી રૂ.1.28 લાખની કિંમતના ચાંદીના દાગીનાની ચોરી કરી હતી. પોલીસે સીસીટીવી ફૂટેજના આધારે તસ્કરોને શોધી કાઢવા તપાસ હાથ ધરી હતી. નવી ભીલડીમાં મોટી કેનાલની સામે મધ્ય બજારમાં આવેલી કુમકુમ જ્વેલર્સની દુકાનને સોમવારે રાત્રે તસ્કરોએ નિશાન બનાવી હતી. તસ્કરોએ દુકાનની બહારના શટરના તાળા તોડી નાખ્યા હતા. લોખંડની જાળી તોડી શકાય તેમ ન હોવાથી દુકાનની અંદરનું કાઉન્ટર તૂટી ગયું હતું. અને જાળીમાં હાથ નાખતાં ચાંદીની કાંબી, ગંગામૂર્તિ, ગોલગાવા, બંગડીઓ, લકી ચાર્મ, પંજાબી બ્રેસલેટ, ચાંદીના ચશ્મા, વાડકા, ચમચા, મંગળસૂત્ર, ફોટો ફ્રેમ અને રૂ.1,28,500ની કિંમતના દાગીનાની ચોરી થઈ હોવાનું જણાયું હતું. મંગળવારે સવારે વેપારીએ ભીલડી પોલીસ સ્ટેશનમાં ચોરીની જાણ કરી હતી.
વેપારીએ ભીલડી પોલીસ મથકે જાણ કરતાં પોલીસે ઘટના સ્થળે આવી તપાસ હાથ ધરી હતી. જેમાં તસ્કરો સીસીટીવી કેમેરામાં કેદ થયા હતા. ફૂટેજના આધારે તપાસ હાથ ધરવામાં આવી હતી. ભીલડીમાં કડકડતી શિયાળાનો લાભ લઈ તસ્કર ટોળકી સક્રિય બની છે. ત્યારે રાત્રીના સમયે સઘન પોલીસ પેટ્રોલીંગ કરવામાં આવે તેવી લોકો માંગ કરી રહ્યા છે.