2 મેના રોજ સુરતના સચિન જીઆઈડીસી વિસ્તારમાંથી જીઆઈડીસી પોલીસે બે દેશી બનાવટની પિસ્તોલ અને એક કારતૂસ સાથે એક આરોપીની ધરપકડ કરી હતી. ત્યારબાદ આ આરોપીની પૂછપરછ કરતાં એક આરોપીને વોન્ટેડ જાહેર કરી તેની પાસેથી દેશી બનાવટની પિસ્તોલ અને 3 જીવતા કારતુસ મળી આવ્યા હતા. આ રીતે પોલીસે ત્રણ દેશી બનાવટની પિસ્તોલ અને ચાર જીવતા કારતૂસ સાથે બે આરોપીની ધરપકડ કરી હતી. આ બંનેની પૂછપરછમાં ખુલાસો થયો હતો કે આ બંને પોતાના વતનથી હથિયારો લાવ્યા હતા અને આ હથિયારો સુરતમાં વેચવા જતા હતા.
સુરતના સચિન GIDC વિસ્તારમાં એક વ્યક્તિ હાથ બનાવટની પિસ્તોલ સાથે રહેતો હોવાની બાતમી સચિન GIDC પોલીસને મળી હતી. આથી, ગુપ્ત માહિતીના આધારે પોલીસે આ કેસમાં રાહુલ ગૌતમ નામના વ્યક્તિની ધરપકડ કરી હતી અને તેની પાસેથી બે દેશી બનાવટની પિસ્તોલ અને એક જીવતો કારતૂસ મળી આવ્યો હતો. રાહુલ ગૌતમની ધરપકડ બાદ પોલીસ પૂછપરછમાં તેની સાથે પ્રિયાંશુ ગૌતમ નામનો આરોપી પણ સામેલ હોવાનું બહાર આવ્યું હતું. ત્યારબાદ સચિન જીઆઈડીસી પોલીસે પ્રિયાંશુ ગૌતમને વોન્ટેડ જાહેર કર્યો હતો અને તેને પકડવા માટે કમર કસી હતી.
સચિન જીઆઈડીસી પોલીસે બાતમીના આધારે સચિન જીઆઈડીસી અન સનમિલમાંથી વોન્ટેડ આરોપી પ્રિયાંશુ ગૌતમની પણ ધરપકડ કરી હતી અને પોલીસે તેની પાસેથી વધુ એક દેશી બનાવટની પિસ્તોલ અને ત્રણ જીવતા કારતૂસ કબજે કર્યા હતા. સચિન જીઆઈડીસી પોલીસે રાહુલ ગૌતમ અને પ્રિયાંશુ ગૌતમની ધરપકડ કરી બંને આરોપીઓ સામે આર્મ્સ એક્ટ હેઠળ ગુનો નોંધ્યો હતો અને બંને આરોપીઓ પાસેથી કુલ ત્રણ દેશી બનાવટની પિસ્તોલ અને ચાર જીવતા કારતુસ મળી આવ્યા હતા.
હવે પોલીસ તપાસ કરશે કે આ બંને આરોપીઓ દેશી બનાવટની પિસ્તોલ કોની પાસેથી લાવ્યા હતા. તેઓ કેટલા સમયથી ગેરકાયદેસર રીતે હથિયારો વેચી રહ્યા છે અને અત્યાર સુધીમાં કેટલા લોકોને વેચ્યા છે?