મહેસાણા, વડનગર તાલુકાના સુલતાનપુરા ગામની સીમમાંથી લોકોને ફોન કરીને શેરબજારમાં રોકાણના બહાને ઓનલાઈન પૈસા ભરાવી છેતરપિંડી કરતા ત્રણ જણાને મહેસાણા એલસીબીએ ઝડપી લીધા હતા.
સુલતાનપુરા ગામની સીમમાં જોગણીયાપરૂ વિસ્તારમાં કેનાલ નજીક ખેતરમાંથી કેટલાક શખ્સો લોકોને ફોન કરી શેરબજારના બહાને છેતરપિંડી કરતા હોવાની બાતમી પેટ્રોલિંગ કરી રહેલી મહેસાણા એલસીબીના પીએસઆઈ એ.ડી.કાકરેચાની ટીમના પો.કો. મૌલિકકુમારને મળી હતી. જેથી એલસીબી પીઆઈ એસ.આર.ચૌધરીની સૂચનાથી ટીમે ત્યાં રેડ કરતાં કેનાલવાળા રસ્તા નજીક એક ખેતરમાં કેટલાક શખ્સો થોડા થોડા અંતરે બેસીને હાથમાં મોબાઈલથી કોલીંગ કરતા જણાયા હતા.
પોલીસ ત્યાં પહોંચતાં તેઓ ભાગ્યા હતા, જે પૈકી ત્રણને પોલીસે ઝડપી લીધા હતા. ઝડપાયેલા ઠાકોર વિક્રમજી ભરતજી (રહે.સુલતાનપુરા, વિરસંગપુરા વિસ્તાર), ઠાકોર અર્જુનજી બાબુજી (રહે.સુલતાનપુરા, હરસિદ્ધપરા) અને ઠાકોર ચેહાજી પથુજી (રહે.સુલતાનપુરા, નવાપરા ખેતરમાં) પાસેથી પોલીસે પાંચ મોબાઈલ તથા મોબાઈલ નંબરની યાદીવાળા કાગળો જપ્ત કર્યા હતા.
આ શખ્સો અન્ય માણસોની જાણ બહાર તેમના નામનાં સીમકાર્ડ વાપરતા હતા. તેઓ પોતાના મોબાઈલમાં માર્કેટ પ્લસ નામની એપ્લીકેશનમાં શેરબજારની વધઘટ જોઈને લોકોને ફોન કરી શેરબજારમાં વધુ કમાણી કરી આપવાની લાલચ આપી રોકાણના બહાને પોતે ઉપયોગ કરતા એકાઉન્ટમાં પૈસા ભરાવી શેરબજારમાં ન રોકીને છેતરપિંડી કરતા હોવાનું ખુલ્યું હતું. પોલીસે ત્રણેય જણા સામે વડનગર પોલીસ મથકે છેતરપિંડી સહિતનો ગુનો નોંધી વધુ તપાસ હાથ ધરી છે.
આ શખ્સો ગ્રાહકોને જે બેન્ક એકાઉન્ટમાં પૈસા ભરાવતા હતા તે બેન્ક એકાઉન્ટ ઠાકોર રણજીતજી ઉર્ફે ભોપાજી મણાજી (રહે.નવાપુરા) હેન્ડલ કરે છે અને ખાતામાં જે પૈસા ભરાય તેમાંથી ૧૫ ટકા કમિશન પેટે પોતે રાખતો અને ખાતા ધારકોને પાંચ ટકા કમિશન આપતો અને બાકીની રકમ તેમને આપતો હોવાની કબૂલાત ઝડપાયેલા શખ્સોએ કરી હતી.SS1MS
