પાકિસ્તાન અધિકૃત કાશ્મીર (PoK)માં શાહબાઝ શરીફ સરકાર વિરુદ્ધ ચાલી રહેલા વિરોધ પ્રદર્શનમાં અત્યાર સુધીમાં 46 લોકોએ જીવ ગુમાવ્યા છે. આ સત્તાવાર આંકડા છે. મામલાથી વાકેફ લોકોનું કહેવું છે કે 100થી વધુ લોકોએ જીવ ગુમાવ્યા છે. આ સિવાય છેલ્લા ચાર દિવસમાં એક હજારથી વધુ લોકોની ધરપકડ કરવામાં આવી છે.
PoKમાં વિરોધની આગ શા માટે સળગી?
પીઓકેમાં 12 અનામત વિધાનસભા બેઠકોને લઈને વિરોધ પ્રદર્શન થઈ રહ્યા છે. આ બેઠકો જમ્મુ અને કાશ્મીરમાંથી સ્થળાંતર કરીને પાકિસ્તાનના જુદા જુદા ભાગોમાં સ્થાયી થયેલા લોકો માટે આરક્ષિત હતી. પીઓકે સુપ્રીમ કોર્ટે અનામત સમાપ્ત કરવાની માંગને ફગાવી દીધી હતી. આ પછી જોઈન્ટ અવામી એક્શન કમિટી (JAAC) એ દેખાવો શરૂ કર્યા. તેમની માંગ છે કે આ અનામત નાબૂદ થવી જોઈએ.
અન્ય દેશોમાં પણ દેખાવો થઈ રહ્યા છે
પાકિસ્તાન સરકારે ડરના કારણે પીઓકેમાં ઇન્ટરનેટ બંધ કરી દીધું છે. આ પછી પણ આને લઈને દુનિયાભરમાં દેખાવો થઈ રહ્યા છે. યુકે અને કેનેડા સહિત જ્યાં પણ પાકિસ્તાનીઓ રહે છે ત્યાં તેઓ સરકાર સામે વિરોધ પ્રદર્શન કરી રહ્યા છે. JAACના નેતાઓ વિરુદ્ધ દેશદ્રોહનો કેસ નોંધવામાં આવ્યો છે અને તેમની ધરપકડ કરવામાં આવી રહી છે. સરકાર અર્ધલશ્કરી દળો દ્વારા આ આંદોલનને કચડી નાખવાનો પૂરો પ્રયાસ કરી રહી છે. બે દિવસ પહેલા પીઓકેમાં પાકિસ્તાની સેનાનું એક હેલિકોપ્ટર પણ ક્રેશ થયું હતું જેમાં સવાર તમામ લોકો માર્યા ગયા હતા.
JAAC શું છે?
JAAC નું પૂરું નામ જમ્મુ અને કાશ્મીર જોઈન્ટ અવામી એક્શન કમિટી છે. આ સંગઠનની રચના 2023માં પ્રોપર્ટી ટેક્સ લગાવવાના નિર્ણય સામે કરવામાં આવી હતી. તેના પ્રમુખ શૌકત નવાઝ મીર છે. હાલમાં આ સંગઠન મોંઘવારી સામે અવાજ ઉઠાવતું રહે છે. 5 જૂન, 2026 ના રોજ, પાકિસ્તાન સરકારે આ સંગઠન પર પ્રતિબંધ મૂક્યો છે અને સૌકત નવાઝ મીર અને અન્ય ત્રણ નેતાઓ પર 1 કરોડ રૂપિયાનું ઈનામ રાખ્યું છે.
