ભારત વિરોધી ઉશ્કેરણી અને કટ્ટરપંથી પ્રવૃત્તિઓ માટે જાણીતા બાંગ્લાદેશી દેવબંદી મૌલવી અને આતંકવાદી નેતા હારૂન ઈઝહરે ફરી એકવાર વિવાદાસ્પદ નિવેદન આપીને હલચલ મચાવી દીધી છે. હારૂન ઈઝહરે દાવો કર્યો છે કે તે અને તેના સમર્થકો બાંગ્લાદેશમાં ભારતીય હાઈ કમિશનને સુરક્ષા પ્રદાન કરશે અને બાંગ્લાદેશમાં કોઈ ટોળાની સંસ્કૃતિ નથી. એટલું જ નહીં, હારૂન ઈઝહરે એમ પણ કહ્યું કે આ જ લોકો બાંગ્લાદેશી હિન્દુઓ અને મંદિરોની સુરક્ષાની જવાબદારી પણ નિભાવી રહ્યા છે. જો કે, જમીની વાસ્તવિકતા આનાથી સાવ વિપરીત જણાય છે. ભૂતકાળમાં, સમાન કટ્ટરવાદી જૂથો વારંવાર ભારતીય હાઈ કમિશન અને સહાયક હાઈ કમિશન પર હુમલો કરવાનો પ્રયાસ કરી રહ્યાં છે.
તાજેતરમાં, ચટ્ટોગ્રામમાં ભારતીય સહાયક હાઈ કમિશનને નિશાન બનાવીને પથ્થરમારો કરવામાં આવ્યો હતો. આ ઘટનામાં 12 લોકોની અટકાયત કરવામાં આવી હતી. આ આરોપીઓને છોડાવવાની માંગણી સાથે હારૂન ઈઝહર ખુદ પોલીસ સ્ટેશન પહોંચ્યો હતો. ત્યાં જ તેણે આ વિવાદાસ્પદ નિવેદન આપ્યું હતું. હારૂન ઈઝહરે કહ્યું, “હું પૂછવા માંગુ છું, શું દૂતાવાસનો કોઈ કાચ તોડવામાં આવ્યો છે? ભારત એક આક્રમક અને આતંકવાદી દેશ છે, પરંતુ બાંગ્લાદેશમાં ભારતીય દૂતાવાસ એક નિર્દોષ સંસ્થા છે. અમે તેની સુરક્ષા પૂરી પાડીશું. અહીં ભારતીય હાઈ કમિશન સામે કોઈ ટોળું નહીં હોય. પોલીસ અને પ્રશાસન પછીની વાત છે, અમે બાંગ્લાદેશીઓ પોતે આવું થવા દઈશું નહીં.”
તેમણે વધુમાં કહ્યું, “જો ભારત સરહદ પર હુમલો કરશે તો અમે જવાબ આપીશું. પરંતુ હાઈ કમિશન નિર્દોષ છે. જો કોઈ અલગ વ્યક્તિ કંઈક કરશે તો અમે તેની જવાબદારી લઈશું નહીં.”
ભારત વિરોધી ધમકીઓનો લાંબો ઇતિહાસ
હારૂન ઈઝહરનું આ નિવેદન એવા સમયે આવ્યું છે જ્યારે તેનો પોતાનો ભૂતકાળ તેના દાવાઓ પર સવાલો ઉભા કરે છે. હારૂન ઈઝહરે અગાઉ ઓપન ફોરમ પરથી કહ્યું હતું કે, “અમે ઢાકાને હચમચાવી દીધું છે. હવે પછી દિલ્હીનો વારો છે, ઈન્શાઅલ્લાહ.”
તાજેતરના મહિનાઓમાં પણ તેણે ઘણી વખત ભારત વિરુદ્ધ ઉશ્કેરણીજનક નિવેદનો આપ્યા છે. સુરક્ષા એજન્સીઓ અને ગુપ્તચર અહેવાલોમાં દાવો કરવામાં આવી રહ્યો છે કે હારૂન ઇઝહર અલ-કાયદા અને લશ્કર-એ-તૈયબા સાથે સંબંધ ધરાવે છે.
