ભારત vs શ્રીલંકા હાઇલાઇટ્સ બીજી T20I- શેફાલી વર્માની તોફાની અડધી સદીના આધારે ભારતે બીજી T20માં શ્રીલંકાને 7 વિકેટે હરાવ્યું. પ્રથમ બેટિંગ કરતા શ્રીલંકાએ ટીમ ઈન્ડિયાને 129 રનનો ટાર્ગેટ આપ્યો હતો, ભારતે શેફાલી વર્માની 69 રનની અણનમ ઈનિંગના આધારે માત્ર 11.5 ઓવરમાં આ સ્કોર હાંસલ કરી લીધો હતો. શેફાલી વર્માએ આ ઈનિંગ દરમિયાન 34 બોલ રમ્યા, જેમાં તેણે 11 ચોગ્ગા અને 1 છગ્ગા ફટકાર્યા, તેનો સ્ટ્રાઈક રેટ 203 ની આસપાસ હતો. આ જીત સાથે ભારતે 5 મેચની શ્રેણીમાં 2-0ની સરસાઈ મેળવી લીધી છે.
129 રનના લક્ષ્યાંકનો પીછો કરતી વખતે ભારતને 29ના સ્કોર પર સ્મૃતિ મંધાના (14)ના રૂપમાં પહેલો ફટકો લાગ્યો હતો. મંધાનાએ ફરી એકવાર નિરાશ કરી હતી. જોકે શેફાલી વર્માની તોફાની બેટિંગ અટકી ન હતી. ભારતે 6 ઓવરમાં 1 વિકેટના નુકસાને 68 રન બનાવ્યા હતા. શેફાલી વર્મા અને જેમિમાહ રોડ્રિગ્સ વચ્ચે બીજી વિકેટ માટે 22 બોલમાં 50 રનની ભાગીદારી થઈ હતી. જેમિમાહ રોડ્રિગ્સ 8મી ઓવરમાં 25 રન બનાવીને આઉટ થઈ ગઈ હતી. ભારતે 9મી ઓવરમાં જ 100 રનનો આંકડો પાર કરી લીધો હતો. શેફાલી વર્માએ 27 બોલમાં પોતાની ફિફ્ટી પૂરી કરી હતી. ભારત જ્યારે જીતથી એક રન દૂર હતું ત્યારે ટીમ ઈન્ડિયાને ત્રીજો ઝટકો હરમનપ્રીત કૌરના રૂપમાં લાગ્યો હતો. વિજેતા રન રિચા ઘોષના બેટમાંથી આવ્યા હતા.
જો શ્રીલંકાની ઈનિંગ્સની વાત કરીએ તો ક્રાંતિ ગૌરે પહેલી જ ઓવરમાં વિકેટ લઈને ભારતને સારી શરૂઆત અપાવી હતી. તેણે શ્રીલંકાના ઓપનર વિશ્મી ગુણારત્નેને કેચ એન્ડ બોલ્ડ કર્યો હતો. આ પછી પાવરપ્લેની છેલ્લી ઓવરમાં સ્નેહ રાણાએ ચમીરા અટ્ટુપટ્ટુ (31)ને ફસાવીને ભારતને બીજી અને મોટી સફળતા અપાવી હતી.
