લગ્નના ડરથી ઘર છોડનારી આશા માટે મદદરૂપ બની સોલા સખી વન સ્ટોપ સેન્ટરની ટીમ
સરહદો ઓળંગીને આવેલી આશાના કાઉન્સેલિંગ બાદ તેનું પુનઃસ્થાપન થયું અને તેને નવજીવન મળ્યું
અમદાવાદની સખી વન સ્ટોપ સેન્ટર, સોલા ટીમ સામે તાજેતરમાં જ એક અત્યંત સંવેદનશીલ અને પડકારજનક કિસ્સો પ્રકાશમાં આવ્યો. માર્ચ 2026ના એક શાંત દિવસે, સ્થાનિક પોલીસ વિભાગ દ્વારા એક 19 વર્ષની અજાણી યુવતીને આશ્રય અને સુરક્ષા માટે ‘સખી વન સ્ટોપ સેન્ટર‘ માં લાવવામાં આવી. યુવતી અત્યંત ડરેલી, મૂંઝવણમાં અને માનસિક આઘાતમાં હોય તેવું પ્રથમ દૃષ્ટિએ જ જણાતું હતું. કાઉન્સેલિંગ દરમિયાન જાણવા મળ્યું કે તેનું નામ આશા છે (નામ બદલેલું છે.).
શરૂઆતના તબક્કામાં જ્યારે કેન્દ્રના કાઉન્સેલરો દ્વારા આશા સાથે વાતચીત કરવાનો પ્રયત્ન કરવામાં આવ્યો, ત્યારે તે કંઈ પણ બોલવા કે જણાવવા તૈયાર નહોતી. ભય અને અવિશ્વાસના કારણે તેણે મૌન સેવી લીધું હતું.
પરંતુ, સખી સેન્ટરની ટીમે હિંમત ન હારી. કાઉન્સેલરોએ સકારાત્મક અભિગમ અપનાવીને સૌ પ્રથમ તેને ઘર જેવો સુરક્ષિત અને હૂંફાળો માહોલ પૂરો પાડ્યો. તેને જમાડવામાં આવી, શાંત કરવામાં આવી અને વિશ્વાસ અપાવવામાં આવ્યો કે અહીં તે સંપૂર્ણપણે સુરક્ષિત છે. આ સતત વહાલ અને કાઉન્સેલિંગના પરિણામે આશાના મનનો ડર દૂર થયો અને તેણે પોતાનું મૌન તોડ્યું. તેણે રડતા રડતા માત્ર એટલું જ જણાવ્યું કે તે ઉત્તર ભારતના પહાડી વિસ્તારના એક નાના ગામ રામનગરની વતની છે.
યુવતી પાસે માત્ર ગામનું નામ મળતાં જ સખી વન સ્ટોપ સેન્ટરના કર્મચારીઓએ તાત્કાલિક ઇન્ટરનેટના માધ્યમોનો ઉપયોગ કરીને તે વિસ્તારના સ્થાનિક પોલીસ સ્ટેશનનો સંપર્ક સાધ્યો. અમદાવાદ ટીમે રામનગર પોલીસ સ્ટેશનના સક્ષમ અધિકારીઓ સાથે ડિજિટલ સંકલન સાધ્યું અને આશાના અહીં હોવાની વિગતો આપી.
એટલું જ નહીં, આશાની તેના વતનની પોલીસ સાથે ફોન પર વાતચીત પણ કરાવવામાં આવી, જેથી સ્થાનિક ભાષા અને લહેકાના આધારે તેની ઓળખ વધુ સ્પષ્ટ થઈ શકે. આ સચોટ માહિતીના આધારે રામનગર પોલીસે તાત્કાલિક એડ્રેસ વેરિફિકેશન કરીને તેના પરિવારની શોધખોળ આદરી અને સફળતાપૂર્વક પરિવારનો સંપર્ક નંબર મેળવી લીધો.
અમદાવાદ સખી વન સ્ટોપ સેન્ટરની ટીમ સતત રામનગર પોલીસના સંપર્કમાં રહીને પરિવાર સાથે કનેક્ટ થઈ. દીકરીની ભાળ મળતાં જ ચિંતિત પરિવાર તાત્કાલિક હજારો કિલોમીટરનો પ્રવાસ ખેડીને જમ્મુ-કાશ્મીર/ઉત્તરી સરહદથી અમદાવાદ સખી વન સ્ટોપ સેન્ટર ખાતે દોડી આવ્યો.
સેન્ટરની સુરક્ષિત અને ભવ્ય વ્યવસ્થા જોઈને તેમજ પોતાની દીકરીને હેમખેમ અને સુરક્ષિત જોઈને આશાની માતા, બહેન અને નાનીના આંખમાં હર્ષના આંસુ આવી ગયા. તેઓ સખી સેન્ટરની ટીમનો વારંવાર આભાર માનવા લાગ્યા.
જ્યારે પરિવાર અને આશાનું સંયુક્ત કાઉન્સેલિંગ કરવામાં આવ્યું ત્યારે જાણવા મળ્યું કે, આશા અગાઉ પણ બે-ત્રણ વાર ઘરેથી આમ કોઈને કંઈપણ કહ્યા વગર નીકળી ગઈ હતી. આ વખતે ઘરેથી કોઈને પણ જાણ કર્યા વિના તે ટ્રેન પકડીને છેક અમદાવાદ આવી પહોંચી હતી. આશાએ કાઉન્સિલર સમક્ષ ખુલાસો કર્યો કે પરિવારજનો તેની મરજી વિરુદ્ધ અન્ય વ્યક્તિ સાથે તેના લગ્ન કરાવી રહ્યા હતા, જેનાથી બચવા માટે તેણે આ પગલું ભર્યું હતું.
આ સંવેદનશીલ મુદ્દાને સમજીને સખી વન સ્ટોપ સેન્ટરના કુશળ કર્મચારીઓએ માત્ર આશાને જ નહીં, પણ તેના પરિવારને પણ વિગતવાર સમજાવ્યો. પરિવારને દીકરીની ઈચ્છા, તેનું ભવિષ્ય અને તેની માનસિક સ્થિતિને માન આપવા માટે કાયદાકીય અને સામાજિક માર્ગદર્શન આપવામાં આવ્યું.
