ગુજરાત યુનિ. પોલીસે મહિલા સહિત ત્રણ લોકો સામે ગુનો નોંધ્યો
યુવતીએ અન્ય બે શખ્સ સાથે મળીને નાગરિકતા મેળવવા માટે ખોટો પાસપોર્ટ ઇસ્યૂ કરાવ્યો હતો
અમદાવાદ,નવરંગપુરા ખાતે આવેલા હુડકો ભવનમાં ઇમિગ્રેશન ઓફિસર સામે પોર્ટુગીઝ નાગરિકતા મેળવવા માટે ખોટા નામ અને ખોટી જન્મ તારીખવાળો ભારતીય પાસપોર્ટ રજૂ કરનારી યુવતી સામે ફરિયાદ નોંધાઇ છે. આ યુવતીએ અન્ય બે શખ્સ સાથે મળીને નાગરિકતા મેળવવા માટે ખોટો પાસપોર્ટ ઇસ્યૂ કરાવ્યો હતો. આ અંગે ઇમિગ્રેશન અધિકારીએ ગુજરાત યુનિવર્સિટી પોલીસ સ્ટેશનમાં ત્રણ શખ્સ સામે ફરિયાદ કરતા પોલીસે તપાસ શરૂ કરી છે.
નવરંગપુરાના હુડકો ભવનમાં FRROઓફિસના પોર્ટલ પર એક અરજી આવી હતી. જેમાં અરજદાર નિશા જગન(રહે.વલસાડ)એ ભારતીય વિઝા મેળવવા માટે અરજી કરી હતી. ત્યાર બાદ અરજદારે પોતાના કેન્સલ કરાવેલા ભારતીય પાસપોર્ટની નકલ અપલોડ કરી હતી. નિશા હુડકો ભવનમાં બાયોમેટ્રિક અને ડોક્યુમેન્ટ વેરિફિકેશન માટે ગત ૧૭ માર્ચે આવી હતી. નિશા જગનને કેન્સલ કરાવેલા ભારતીય પાસપોર્ટ સિવાયના બીજા ડોક્યુમેન્ટ રજૂ કરવાનું કહેતા સંતોષકારક જવાબ આપ્યો નહોતો.
જેથી ઇમિગ્રેશન ઓફિસર ઇશિતા ઠક્કરે સિનિયર અધિકારી સાથે મળીને પૂછપરછ કરતા નિશા જગને જણાવ્યું હતું કે, તેનું સાચું નામ નિશા પટેલ છે અને તે મૂળ વલસાડના રહેવાસી છે. ડોક્યુમેન્ટ ચેક કરતા નિશા પાસેથી પાનકાર્ડની નકલ પણ મળી આવી હતી. નિશા જગને પોર્ટુગીઝની નાગરિકતા મેળવવા માટે દમણ ખાતે રહેતા હેમંત જગન અને મોહસીનનો સંપર્ક કરી સાચું નામ અને જન્મ તારીખ ખોટી દર્શાવી ભારતીય પાસપોર્ટ ઇસ્યૂ કરાવ્યો હતો. જેથી નિશા, હેમંત જગન અને મોહસીન સામે ગુજરાત યુનિવર્સિટી પોલીસે ગુનો નોંધી તપાસ શરૂ કરી છે.SS1
