સુરત, અમેરિકા અને ઈરાન વચ્ચે છેડાયેલા યુદ્ધની સીધી અને આકરી અસર સુરતની સુમુલ ડેરી સુધી પહોંચી છે. રાંધણ ગેસના ભાવમાં થયેલા તોતિંગ વધારાને કારણે શ્રમિકો માટે બે ટંકનું ભોજન બનાવવું પણ દુષ્કર બનતા ડેરીમાં કોન્ટ્રાક્ટ પર કામ કરતા કામદારોએ વતનની વાટ પકડી છે.
આ શ્રમિકોની અછતને પગલે દક્ષિણ ગુજરાતની જીવાદોરી સમાન સુમુલ ડેરીના નવી પારડી સ્થિત મહત્ત્વના પ્લાન્ટ્સ બંધ કરવાની ફરજ પડી છે.આ પ્લાન્ટ બંધ થતાં હાલ બજારમાં સુમુલ ડેરીનું બફેલો મિલ્કની એક અને છ લીટરની થેલી મળતી નથી. આ સાથે જ ઇલાયટની નાની અને સ્લીમ એન્ડ ટ્રીમ દૂધની નાની થેલી પણ મળતી નથી.
જ્યારે વીતેલા ચારેક દિવસથી મસાલા છાસ પણ બજારમાંથી ગાયબ થઈ ગઈ છે.અમેરિકા-ઈરાન યુદ્ધની સૌથી માઠી અસર ગરીબ અને મધ્યમ વર્ગના શ્રમિકો પર પડી છે. થાકી હારીને સુમુલ ડેરીના અલગ અલગ પ્લાન્ટ્સમાં કામ કરતા અંદાજે ૭૦૦થી વધુ કુશળ અને અકુશળ શ્રમિકોએ વતન તરફ હિજરત કરી છે.
કામદારોએ વતનની વાટ પકડતાં સુમુલ ડેરીએ નવી પારડી સ્થિત દહીં, પનીર, મિઠાઈ અને બેકરી આઈટમ બનાવતા પ્લાન્ટને બંધ કરવો પડ્યો છે. હાલ દહીં, મિઠાઈ અને બેકરી આઈટમનો સ્ટોક નથી.નવી પારડીના ૫૦ ટકા કામદારો અને સુરત સ્ટેશન સ્થિત સુમુલ ડેરીના પ્લાન્ટના પ૦ ટકા કામદારો પલાયન થઈ જતાં દુધની થેલીના ઉત્પાદનને પણ માઠી અસર પહોંચી છે.
હવે દૂધનું વિતરણ નહીં ખોરવાઈ તેથી નવી પારડીના કામદારોને સુરત લાવી અમૂલ ગોલ્ડ સહિતની પ્રોડક્ટનું ઉત્પાદન કાર્યરત રાખવામાં આવ્યું છે. જોકે, અનુભવી કામદારોની અછતને કારણે ઉત્પાદન ઉપર અસર વર્તાઈ રહી છે. સુમુલ ડેરીના પ્લાન્ટની કેપેસિટી ક્ષમતા કરતા ઓછી થઈ ગઈ છે.
કેપેસિટી ઘટી જતાં ડેરીના જવાબદારોએ દૂધની કેટલીક આઈટમોનું ઉત્પાદન બંધ કરી દીધું છે. ખાસ કરીને સુમુલ ડેરીએ બફેલો મિલ્કની એક અને છ લીટરની થેલી બંધ કરી દીધી છે. આ સાથે જ ઈલાયટ અને સ્લીમ એન્ડ ટ્રીમ દૂધની નાની થેલીનું પણ ઉત્પાદન ઘટી જતાં બજારમાં નાની થેલી જોવા મળતી નથી.
નવી પારડી અને સુરત પ્લાન્ટના અડધોઅડધ કામદારો પલાયન થઈ જતાં ડેરીની કાર્યક્ષમતા પર માઠી અસર પડી છે. છેલ્લા ચાર દિવસથી બજારમાંથી મસાલા છાશ ગાયબ છે, જ્યારે હોટલ-રેસ્ટોરન્ટમાં વપરાતી બફેલો મિલ્કની મોટી થેલીઓનું વિતરણ પણ અટકાવી દેવામાં આવ્યું છે. આગામી દિવસોમાં જો સ્થિતિ નહીં સુધરે તો ડેરી ઉદ્યોગ પર મોટું સંકટ આવી શકે છે.SS1MS
