(પ્રતિનિધિ) મોડાસા, અરવલ્લી જિલ્લામાં પત્રકારો વચ્ચે એકતા, સહકાર અને મિત્રતાને વધુ મજબૂત બનાવવા માટે મોડાસાના જીનીયસ ક્રિકેટ ગ્રાઉન્ડ પર અનોખી ક્રિકેટ ટુર્નામેન્ટનું આયોજન કરવામાં આવ્યું હતું.
ઇલેક્ટ્રોનિક અને પ્રિન્ટ મીડિયાના પત્રકારોએ ચાર ટીમોમાં વહેંચાઈ રમતમાં ઉત્સાહભેર ભાગ લઈને રમત સાથે આનંદની ક્ષણો માણી હતી.૨૪ માર્ચે યોજાયેલી આ ટુર્નામેન્ટમાં મારુતિનંદન-૧૧, કેસરીનંદન-૧૧, વીરનંદન-૧૧ અને રઘુનંદન-૧૧ ટીમોએ ભાગ લીધો હતો. પ્રથમ મુકાબલો મારુતિનંદન-૧૧ (કેપ્ટન વૈભવ રાઠોડ) અને રઘુનંદન-૧૧ (કેપ્ટન હાર્દિક પટેલ) વચ્ચે રમાયો હતો, જ્યારે બીજી મેચ કેસરીનંદન-૧૧ (કેપ્ટન નરેશ ભરવાડ) અને વીરનંદન-૧૧ (કેપ્ટન કનુભાઈ પટેલ) વચ્ચે યોજાઈ હતી.
ફાઈનલ મુકાબલો મારુતિનંદન-૧૧ અને વીરનંદન-૧૧ વચ્ચે રમાયો હતો. જેમાં મારુતિનંદન-૧૧એ પ્રથમ બેટિંગ કરતા ૧૨ ઓવરમાં ૧૨૭ રનનો મજબૂત ટાર્ગેટ મુક્યો હતો. તેનો પીછો કરતાં વીરનંદન-૧૧ ટીમ ૧૦૯ રન સુધી જ પહોંચી શકી અને મારુતિનંદન-૧૧એ ૧૮ રને ભવ્ય વિજય મેળવી ટ્રોફી પોતાના નામે કરી હતી.
વિજેતા ટીમને મોડાસાના ગાયનેક ડૉ. રવિ પ્રજાપતિ દ્વારા ?૧૧,૦૦૦ ની રોકડ રકમ આપી સન્માનિત કરવામાં આવી હતી. આ ટુર્નામેન્ટને સફળ બનાવવા માટે અનેક સ્પોન્સરોનો સહયોગ મળ્યો હતો — જેમાં બાબુસિંહ ચૌહાણ, કનુભાઈ પટેલ, નરેશભાઈ ભરવાડ, શાનુ મલેક, મેહુલભાઈ પટેલ, કૌશિક પટેલ, નરેન્દ્રસિંહ ટિંટોઇ, ઇશાક મન્સુરી, અને આશિષભાઈ પટેલ પૂર્વ કોર્પોરેટર સહિતના દાતાઓએ મહત્વપૂર્ણ યોગદાન આપ્યું હતું.
ઉપરાંત પત્રકાર પિયુષભાઈના સહયોગથી દોસ્ત ફાઉન્ડેશન અને ડાબર ગ્લુકોપ્લસ-સી દ્વારા પણ સહયોગ મળ્યો હતો.ટુર્નામેન્ટમાં ભાગ લેનાર તમામ ખેલાડીઓને દાતા તરફથી ટી-શર્ટ આપવામાં આવી હતી, જે આ આયોજનને વધુ યાદગાર બનાવ્યું હતું.
અંતે, મોડાસા તાલુકા પત્રકાર પ્રમુખ વૈભવ રાઠોડ તેમજ અરવલ્લી જિલ્લાના તમામ પત્રકારોએ સહયોગ આપનાર તમામ દાતાઓ અને સ્પોન્સરોનો હૃદયપૂર્વક આભાર વ્યક્ત કર્યો હતો..આ સમગ્ર કાર્યક્રમ પત્રકારો માટે માત્ર રમત નહીં પરંતુ એકતા, સંગઠન અને ટીમ સ્પિરિટનો જીવંત દાખલો બની રહ્યો હતો.
