મોરબીમાં વિશેષ સિદ્ધિ પ્રાપ્ત કરનાર મહિલાઓનું સન્માન
મોરબી, જિલ્લા વહીવટી તંત્ર દ્વારા સનાળા ખાતે જિલ્લા કક્ષાનું મહિલા સંમેલન જિલ્લા પંચાયત પ્રમુખ શ્રીમતી હંસાબેન પારેઘીના અધ્યક્ષસ્થાને અને જિલ્લા કલેકટર કે.બી. ઝવેરીની વિશેષ ઉપસ્થિતિમાં યોજાયું હતું. જેમાં વિશેષ સિદ્ધિ પ્રાપ્ત કરનાર મહિલાઓનું સન્માન થયું હતું.
આ સંમેલનમાં મોરબી જિલ્લાના પદાધિકારીઓ અને અધિકારીઓના હસ્તે મહિલાલક્ષી વિવિધ યોજનાઓના લાભાર્થીઓને સહાયના ચેક તથા મંજુરી હુકમોનું વિતરણ કરવામાં આવ્યું હતું. જેમાં ખાસ કરીને વહાલી દીકરી યોજના, ગંગા સ્વરૂપા આર્થિક સહાય યોજના, મહિલા સ્વાવલંબન યોજના સહિત અન્ય સરકારી યોજનાઓના લાભાર્થીઓને લાભ આપવામાં આવ્યા હતા.
અધ્યક્ષસ્થાનેથી જિલ્લા પંચાયત પ્રમુખ શ્રીમતી હંસાબેન પારેઘીએ ઉપસ્થિત મહિલાઓને જણાવ્યું હતું કે, મહિલાઓની માતા, દીકરી, સાસુ સહિતની અનેક ભૂમિકા છે. તે જ ઘરને સ્વર્ગ બનાવે છે. તે વધતા જતા વૃદ્ધાશ્રમોને ઓછા કરી શકે છે. માતા એ સૃષ્ટિનું સર્જન છે, ત્યારે તેનું સન્માન થવું જ જોઈએ. આજે વિશ્વની અંદર સામાજિક અને આર્થિક ક્ષેત્રોમાં મહિલાઓનું મહત્વનું યોગદાન રહેલું છે.
જિલ્લા પંચાયતના ઉપપ્રમુખ હીરાભાઈ ટમારીયાએ કહ્યું હતું કે, ભારતીય સંસ્કૃતિમાં આપણે નારી શક્તિની પૂજા કરતા આવ્યા છીએ. મોરબી જિલ્લામાં અનેક અધિકારીઓ મહિલા છે તે ગૌરવની વાત છે.
જિલ્લા કલેકટર કે.બી. ઝવેરીએ કહ્યું હતું કે, આપણે સામાજિક કુરિવાજોમાંથી બહાર આવી દરેક ક્ષેત્રમાં આગળ આવવું જોઈએ. મહિલાઓ પુરુષોને ખૂબ સન્માન આપે છે તેવી અપેક્ષા પુરુષો પાસે પણ હોવી જ જોઈએ. કામ કરતી મહિલાઓ ઘર પણ સંભાળે છે અને બેવડી જવાબદારીઓ નિભાવે છે. સાસુ-વહુના કિસ્સામાં આપણે ત્યાં એક સ્ત્રી બીજી સ્ત્રીને સન્માન આપે તે પણ ખૂબ જરૂરી છે.
જિલ્લા વિકાસ અધિકારી નવલદાન ગઢવીએ કહ્યું હતું કે, પુરુષ કરતા મહિલાઓમાં વાત્સલ્ય, સેવા અને માનવીય અભિગમ વધુ હોય છે, એટલે જ પ્રકૃતિએ બાળ ઉછેરની જવાબદારી મહિલાઓને આપી છે.
સ્વાગત પ્રાંત અધિકારી પ્રવિણસિંહ જેતાવત દ્વારા કરાયું હતું. કિશોરીઓ દ્વારા સ્વાગત ગીત રજૂ કરાયું હતું. કાર્યક્રમના ભાગરૂપે કાર્યક્રમ સ્થળે મહિલાઓને વિવિધ યોજનાઓ વિશે માહિતી પ્રદાન કરવા લીડ બેંક સખી મંડળ આરોગ્ય વિભાગ સહિત વિવિધ સ્ટોલ્સ ઉભા કરવામાં આવ્યા હતા. નાયબ જિલ્લા વિકાસ અધિકારી શૈલેષચંદ્ર ભટ્ટ, સીડીએચઓ ડો. પવનકુમાર શ્રીવાસ્તવ, મહિલા બાળ અધિકારી જલ્પા ત્રિવેદી, પ્રોગ્રામ ઓફિસર મયુરી ઉપાધ્યાય, પોલીસ ઈન્સ્પેકટર પી.એચ. લગધીરકા, દહેજ પ્રતિબંધક અધિકારી સીમાબેન શિંગાળા તથા મોટી સંખ્યામાં મહિલાઓ ઉપસ્થિત રહ્યા હતા.
